Astanada túngi ýaqytta feıerverk ushyrǵan birneshe adam jazalandy. Bir er adam «Báıterek» mańynda dosynyń balasyn quttyqtap, bes táýlikke qamaýǵa alyndy, dep habarlaıdy infohub.kz.
Astana polısıa departamentiniń baspasóz qyzmetiniń málimetinshe, osy aptanyń ózinde elordada feıerverk ushyrýǵa baılanysty qoǵamdyq tártipti buzýdyń úsh deregi tirkelgen. 22 shildege qaraǵan túni turǵyn úıdiń aýlasynda bir top adam salút ushyryp, daýys shyǵaryp, turǵyndardyń tynyshtyǵyn buzǵan. Oqıǵaǵa qatysy bar altyǵa jýyq adam anyqtalyp, olarǵa tynyshtyqty buzǵany úshin ákimshilik is qozǵaldy. Pırotehnıkany 30 jastaǵy áıel ushyrǵan. Ol usaq buzaqylyǵy úshin 20 AEK (86 500 teńge) mólsherinde aıyppul salynyp, jaýapkershilikke tartyldy.
Taǵy bir derek 23 shildede «Báıterek» monýmenti alańynda tirkeldi. Onda da pırotehnıka ushyrylǵany anyqtaldy. Tekserý kezinde 37 jastaǵy er adam dosyn kópten kútken balasynyń dúnıege kelgenimen quttyqtaǵysy kelgenin túsindirdi. Onyń aıtýynsha, pırotehnıkany ınternet-dúkennen aldyn ala satyp alǵan. Qoǵamdyq tártipti buzǵany úshin ol ákimshilik jaýapkershilikke tartylyp, bes táýlikke ákimshilik qamaýǵa alyndy.
Taǵy bir oqıǵa 24 shildede Qoshqarbaev dańǵylynda tirkeldi. Onda 24 jastaǵy jigit dosyn qyz alyp kelgenimen quttyqtaý úshin feıerverk uıymdastyrǵan. Oǵan qatysty ákimshilik materıaldar daıyndalyp, sheshim qabyldaý úshin sotqa jiberildi.