Keshe 48 jastaǵy shetel azamaty Botanıkalyq baqta usaq buzaqylyq úshin 15 táýlikke qamaldy. Astananyń saıabaqtary men skverlerinde aýqymdy reıdter bastaldy, dep habarlaıdy infohub.kz saıty.
Birlesken reıdti Esil aýdany ákimdiginiń qyzmetkerleri, Astana polısıa departamentiniń ókilderi jáne qoǵam qaıratkerleri ótkizdi. Tekserý Botanıkalyq baqtan bastaldy. Aldaǵy ýaqytta mundaı is-sharalar turaqty túrde ótkizilip, elordanyń basqa da qoǵamdyq aımaqtaryn qamtıdy.
Reıdke qatysýshylar abattandyrý erejeleriniń saqtalýyn baqylap, kelýshilermen túsindirme áńgimeler júrgizedi.
Ákimdiktiń habarlaýynsha: «Sonymen birge Botanıkalyq baq aýmaǵynda zańsyz saýda men balalardyń elektromobılderin ruqsatsyz jalǵa berýge jol bermeý boıynsha jumys júrgizilýde, óıtkeni mundaı áreket ruqsat qujattarynsyz tutynýshylardyń densaýlyǵy men ómirine qaýipti».
Esil aýdany ákiminiń orynbasary Baqytjan Aldaýov Botanıkalyq baqtyń oıyn-saýyq parki emes ekenin atap ótti: onyń aýmaǵynda sırek kezdesetin ósimdikter ósedi. Ol balalarmen serýendeýge jáne taza aýada demalýǵa arnalǵan.
Astana polısıa departamentiniń qoǵamdyq qaýipsizdik basqarmasy basshysynyń orynbasary Erkin Janabyldyń aıtýynsha: «Jyl basynan bergi is-sharalar barysynda Botanıkalyq baqtyń irgeles aýmaǵynda abattandyrý erejelerin buzǵany úshin 700-den astam adam ákimshilik jaýapkershilikke tartyldy. QR ÁQBtK-niń 505-babynyń birinshi bóligi boıynsha eskertý nemese 20 AEK mólsherinde ákimshilik aıyppul kózdelgen. Sondaı-aq belgilenbegen oryndarda saýda jasaǵany úshin 300-den astam adam jaýapkershilikke tartyldy, bul buzýshylyqtyń aıyppuly 10 AEK quraıdy».
Ákimdik sońǵy mysaldy keltirdi: keshe Botanıkalyq baqta qoǵamdyq tártipti buzǵany úshin shetel azamaty 15 táýlikke qamaldy. Kórshi memlekettiń 38 jastaǵy turǵyny demalýshylardyń kóz aldynda gazonǵa dáret syndyrýǵa tyrysqan. Polısıa qyzmetkerleri hattama toltyryp, sot usaq buzaqylyq úshin 15 táýlik ákimshilik qamaq jazasyn taǵaıyndady.