Astana turǵyny túngi klýbtaǵy janjaldan keıin toptyń shabýylyna ushyraǵanyn habarlady. Qyzdyń aıtýynsha, ony jerge qulatyp, aıaqpen teýip, shashynan súıregen, dep habarlaıdy infohub.kz saıty.
Threads áleýmettik jelisindegi welobeee degen atpen tirkelgen qoldanýshy óz jazbasynda Astanadaǵy klýb mańynda kóshede ózine shabýyl jasalǵanyn aıtty. «Olar top bolyp shabýyldap, meni uryp-soǵyp, vıdeosyn taratty. 15 tamyzda men bir jigitti baıqaýsyzda túrtip aldym da, birden keshirim suradym. Biraq onyń qyzdaryna bul azdyq etti: olar maǵan balaǵattap, "Sen nege sonsha keńsiń?" dep qorlaı bastady. Sol jigit te qosylyp, maǵan qol kótere bastady. Aralasqan kúzetshilerge raqmet. Biraq ol top tynyshtalmady. Olar klýb jabylǵanda tańǵy saǵat 6-da meni kóshede kútip turyp, top bolyp shabýyldady. Mekemeniń beınekameralarynan meniń jyǵylyp, aıaqpen teýilgenim, shashynan súırelgenim anyq kórinedi. Nátıjesinde: búkil denemde gematomalar jáne jeńil mı shaıqalýy. Osy ýaqyt boıy kúzetshiler olardy menen áreń ajyratyp júrdi. Biraq eń qorqynyshy keıin bastaldy. Ol jigit meni jatqan kúıimde qyzdary uryp jatqan vıdeosyn túsirip, ony Telegram-arnalar men pablıkterge tarata bastady», — dep jazdy ol.
Qazaqstandyqtyń aıtýynsha, janjaldasqan adamdar oǵan áleýmettik jelilerde jazyp, polısıaǵa bergen aryzyn qaıtaryp alýdy talap etip jatyr. Bul jarıalanymǵa Astana polısıa departamenti jaýap berdi. «Esil aýdanynyń polısıa basqarmasy dene jaraqatyn salý faktisi boıynsha sotqa deıingi tergeý bastady. Qazirgi ýaqytta qajetti tergeý áreketteri júrgizilip, saraptama taǵaıyndaldy. Osy quqyq buzýshylyqqa qatysy bar barlyq adamdardy anyqtaý sharalary qabyldanýda. Tergeý múddesine baılanysty ózge málimetter jarıa etilmeıdi», — delingen habarlamada.