Astanada sot oıyn-saýyq mekemesinde TikTok-te tikeleı efır júrgizip, «kúńkil gaz» jutqan jáne bylapyt sóılegen áıelge ákimshilik jaza sharasyn ózgertti — ákimshilik qamaýǵa alýdyń ornyna oǵan aıyppul salyndy, dep habarlaıdy infohub.kz saıty.
Astananyń ákimshilik quqyq buzýshylyqtar jónindegi mamandandyrylǵan aýdanaralyq sotynyń málimetinshe, azamatshaǵa qatysty usaq buzaqylyqty qaıtalap jasaý týraly is — Ákimshilik quqyq buzýshylyq týraly kodekstiń 434-babynyń 2-bóligi boıynsha qaralǵan.
«13 qyrkúıekte shamamen saǵat 07:00-de Á. qoǵamdyq oryn bolyp tabylatyn oıyn-saýyq mekemesinde ózin dóreki jáne órkókirek ustap, áýe sharynyń ishindegisin ádeıi demep shyǵaryp, bylapyt sózder aıtty. Osylaısha ol aınalasyndaǵylarǵa ashyq qurmetsizdik tanytyp, qoǵamdyq tártipti jáne azamattardyń tynyshtyǵyn buzdy», — dep atap ótti sotta.
Buǵan deıin áıel ÁQBtK-niń 434-babynyń 1-bóligi boıynsha ákimshilik jaýapkershilikke tartylǵany belgili boldy. Atalǵan quqyq buzýshylyq ol tarapynan ákimshilik jaza qoldanylǵannan keıin bir jyl ishinde jasalǵan.
«Sot otyrysynda Á. kinásin moıyndap, аlkogóldik sýsyn ishkenin, mekemeden gaz toltyrylǵan áýe sharyn satyp alǵanyn jáne áreketiniń saldaryn oılamastan TikTok áleýmettik jelisinde tikeleı efırge shyqqanyn túsindirdi», — dedi sotta.
Ákimshilik jaza taǵaıyndaý kezinde sot azamatshanyń 14 jasqa tolmaǵan balany jalǵyz ózi tárbıelep otyrǵanyn anyqtady. Qoldanystaǵy zańnamaǵa sáıkes 14 jasqa deıingi balasy bar áıelderge ákimshilik qamaýǵa alý qoldanylmaıdy.
«ÁQBtK-niń 434-babynyń 2-bóliginde kózdelgen ákimshilik qamaýǵa alý túrindegi jaza Á-ǵa qoldanyla almaıtyndyqtan, sot quqyq buzýshylyqtyń saralanýyn neǵurlym jeńil ákimshilik jaza kózdeıtin normaǵa (ÁQBtK-niń 829-14-babynyń 4-bóligi) ózgertti. Osyny eskere otyryp, Á-nyń áreketteri 20 AEK mólsherinde aıyppul salýdy kózdeıtin ÁQBtK-niń 434-babynyń 3-bóligi boıynsha saralandy. Sot qaýlysymen Á. kináli dep tanylyp, 86 500 teńge mólsherinde aıyppul túrindegi ákimshilik jazaǵa tartyldy», — dep atap ótti sotta.
Qaýly zańdy kúshine engen joq.
Buǵan deıin áleýmettik jelilerdi monıtorıńileý barysynda polısıa qyzmetkerleri qyzdyń qatysýymen jarıalanǵan jazbany anyqtaǵany habarlanǵan. Tikeleı efır kezinde ol ózin agressıvti ustap, qoǵamdyq tártipti buzyp, bylapyt sóılegen. Kóp uzamaı osy derek boıynsha polıseıler Almaty oblysynyń 27 jastaǵy týmasyn anyqtaǵan.