Astananyń mamandandyrylǵan aýdanaralyq ekonomıkalyq soty Saltanat Núkenovany óltirgeni úshin sottalǵan Qýandyq Bıshimbaevtyń anasy Almıra Nurlybekovanyń onyń burynǵy jubaıy Nazym Qaharmanǵa qoıǵan talap-aryzy boıynsha sheshim shyǵardy. Aryzda 14 mln teńgeden astam qarajat óndirip alý suralǵan, dep habarlaıdy infohub.kz saıty.

İs materıaldaryna sáıkes, jeke kásipker Nurlybekova 2023 jylǵy 1 qarashada ózine tıesili úı-jaıdy jaýapkerge — Nazym Qaharman ıelik etetin «NazKa» JK-ǵa 2029 jylǵy 31 qazanǵa deıingi merzimge senimgerlik basqarýǵa bergen.

«Talap qoıýshy jaýapkerdiń óziniń múlkin jalǵa berýden tabys alǵanyn, alaıda úı-jaıdy paıdalanǵannan túsken qarajatty talap qoıýshyǵa bermegenin jáne rastaıtyn qujattary bar tolyq esep usynbaǵanyn, munyń senimgerlik basqarýshy mindettemelerin tıisinshe oryndamaý bolyp tabylatynyn kórsetti», — delingen is materıaldarynda.

Nátıjesinde Nurlybekova sot arqyly «NazKa» JK-dan sharttyq mindettemelerdi tıisinshe oryndamaǵany úshin 14 074 771 teńge óndirip alýdy, sondaı-aq tólengen memlekettik baj men ókil qyzmetine jumsalǵan shyǵyndy óteýdi talap etti. Jaýapker bolsa, talap qoıý somasy men ony óndirý negizderin negizsiz dep taýyp, aryzdy tolyq kólemde qabyldamaýdy surady.

Daýdy sheshý barysynda sot jaýapkerdiń talap qoıýshy aldyndaǵy beresheginiń jetkilikti ári senimdi dálelderin anyqtaı almaı, talap qoıýshynyń dálelderimen ishinara ǵana kelisti. Osy sebepti somanyń bir bóligi — 5 839 380 teńge — qanaǵattandyrýǵa jatpaıdy, delingen sheshimde.

«„Nurlybekova Almıra Baltabaevna“ JK-nyń „NazKa“ JK-ǵa somany óndirý týraly talap qoıýyn ishinara qanaǵattandyrý. „NazKa“ JK-dan „Nurlybekova Almıra Baltabaevna“ JK-nyń paıdasyna 6 665 391 teńge, 66 654 teńge memlekettik baj, 666 539 teńge ókil qyzmetine jumsalǵan shyǵyn óndirilsin. „Nurlybekova Almıra Baltabaevna“ JK-nyń „NazKa“ JK-ǵa 7 409 380 teńge somany óndirý týraly talap qoıýyn qanaǵattandyrýdan bas tartylsyn», — delingen sot sheshiminde.

Sheshimge apelásıalyq shaǵym túsirýge bolady.

Buǵan deıin Saltanat Núkenovany óltirgeni úshin sottalǵan Qýandyq Bıshimbaevtyń burynǵy áıeli Nazym Qaharman oǵan onyń anasy sotqa talap qoıǵanyn málimdegen. Ol kezde talap somasy shamamen 25 mln teńge ekenin aıtqan.