Astana sotynda feldsher Uldana Myrzýannyń qaza tabýyna qatysty is boıynsha taraptardyń jaryssózi aıaqtaldy. Aıyptalýshy — múlik ıeleriniń birlestigi (MIB) tóraıymy Sáýle Jubanıazova óziniń kinásizdigin málimdedi, al onyń qorǵaýshysy aqtaý úkimin shyǵarýdy talap etti, dep habarlaıdy infohub.kz saıty.
«Qaýipti bile turyp, shara qoldanbas pa edim?» — dep surady sotqa sóz sóılegen aıyptalýshy. Jaryssóz barysynda ol marqumnyń otbasyna kóńil aıtyp, kinásin moıyndamady jáne úıdiń jasyryn aqaýlary týraly bile almaıtynyn atap ótti.
«Turǵyn úı qatynastary týraly zańǵa silteme jasaı otyryp, onda tóraǵanyń arnaıy bilimi bolýy talap etilmeıtinin aıtqym keledi — turǵyn úı-kommýnaldyq sharýashylyq salasynda da, qurylys salasynda da. Tóraǵa tek múlik ıeleriniń nemese olardyń týystarynyń arasynan saılanady», — dedi Jubanıazova.
Ol apat kezinde MIB-ti bar bolǵany alty aı basqarǵanyn, al buǵan deıingi tekserý aktileri ózine berilmegenin atap ótti.
«Josparly tekserý júrgizýdiń bir jyldyq merzimi áli bitpegen, sondyqtan meniń tarapymnan eshqandaı buzýshylyq joq. Tekserýdi júrgizdim, biraq aktimen rásimdemedim. Alaıda ol rásimdelgenniń ózinde de bolǵan jaǵdaıǵa áser etpes edi», — dep atap ótti aıyptalýshy.
Sońynda Sáýle Jubanıazova ózi de osy úıde turatynyn jáne onyń qaýipsizdigine basqalardan kem qamqorlyq jasamaıtynyn málimdedi.
«Men ózim sonda turamyn, jaqyndarym sonda turady. Bul apatta meniń balalarym, anam, ózim zardap shegýimiz múmkin edi. Qaýipti bile turyp, shara qoldanbas pa edim? Qurmetti sot, men ózimdi kinásiz dep sanaımyn jáne ádil sheshim qabyldaıtynyńyzǵa senemin», — dep qorytyndylady Jubanıazova.
Qorǵaý tarapy aqtaýdy talap etedi. Aıyptalýshynyń advokaty Dáýren Eslembekuly jaryssózde aıyptaý tarapy MIB tóraıymynyń kinásin dáleldeıtin dálelder usynbaǵanyn málimdep, sotty aqtaý úkimin shyǵarýǵa shaqyrdy.
«Sot zerttegen materıaldar ǵımarattyń uzaq ýaqyt boıy qurylymdyq jáne qurylystyq aqaýlary týraly mańyzdy málimetterdi qamtıdy. Meniń qorǵalýshymym osy aqaýlardy óz betinshe anyqtaı alatynyn aıyptaý tarapy dáleldegen joq», — dedi ol.
Advokat sondaı-aq sotqa deıingi tergeý barysynda qorǵalýshynyń quqyqtary buzylǵanyn málimdedi.
«Adamdy bolǵan jaǵdaıdy túsindirýge yńǵaıly bolǵandyqtan ǵana kináli dep tanýǵa bolmaıdy... Tek onyń jeke kinási ruqsat etilgen, senimdi jáne jetkilikti dáleldermen dáleldengen jaǵdaıda ǵana. Sotqa mundaı dálel usynylmady. Sottan aqtaý úkimin shyǵarýdy suraımyn», — dep qorytyndylady Eslembekuly.
Eske salaıyq, buǵan deıin astanalyq MIB tóraǵalary Jubanıazovany qorǵap, jańa úılerdiń apattyq qasbetteri júıeli másele ekenin, olardy jóndeý júzdegen mıllıon teńgege baǵalanyp, turǵyndarǵa aýyr ekenin málimdegen bolatyn.
Keıin zardap shekkender MIB tóraıymynan 45 mln teńgeden astam qarajat óndirýdi talap etti. Olar materıaldyq jáne moraldyq shyǵyndaryn osylaı baǵalady. Alaıda aıyptalýshy kinásin de, qoıylǵan talap-aryzdardy da joqqa shyǵardy.
Buǵan deıin «Kýrsıv» prokýror Serıkova MIB tóraıymyna eki jyl bas bostandyǵyn shekteý jazasyn suraǵanyn jazǵan. Uldana Mýrzýannyń anasy aqshalaı ótemaqydan bas tartyp, Jubanıazovaǵa bas bostandyǵynan aıyrýǵa baılanysty emes jaza taǵaıyndaýdy surady. Marqumnyń burynǵy jubaıy sheshimdi sottyń qalaýyna qaldyrdy.