Astana turǵyny tis emdeý klınıkasynda ýáde etilgen, biraq kórsetilmegen qyzmetter úshin aqshasyn ishinara qaıtaryp ala aldy, dep habarlaıdy infohub.kz saıty.
Tutynýshylardyń quqyqtaryn qorǵaý komıtetiniń málimetinshe, Astana qalasy boıynsha saýda jáne tutynýshylardyń quqyqtaryn qorǵaý departamentine jalpy quny 802 725 teńge bolatyn tis emdeýge rassrochka resimdegen azamat júgingen.
Tutynýshyǵa tis emdeý men julýdy, sondaı-aq breket-júıesin ornatýdy qamtıtyn keshendi stomatologıalyq qyzmetter belgilengen merzimde kórsetilýi tıis edi. Alaıda is júzinde tólengen qyzmetterdiń tek bir bóligi ǵana kórsetilgen. Tutynýshyǵa ortodont usynylmaǵan, ortodontıalyq emdeý jospary jasalmaǵan, al breket-júıesin ornatý merzimderi birneshe ret keıinge shegerilgen.
Osyǵan baılanysty tutynýshy stomatologıalyq klınıkaǵa kórsetilmegen qyzmetter úshin aqshany qaıtarýdy talap etip júgingen, alaıda tıisti jaýap almaǵan.
Ótinishti qaraý barysynda mamandar jaǵdaıdy retteý boıynsha jumys júrgizgen. Nátıjesinde tutynýshyǵa kórsetilmegen qyzmetter úshin aqsha qaıtarylǵan.
Baspasóz qyzmetinde atap ótilgendeı: «Medısınalyq jáne ózge de qyzmetterdi tóleý kezinde tutynýshylarǵa sharttardy, chekterdi, tólemdi rastaıtyn qujattardy, sondaı-aq oryndaýshymen hat almasýdy saqtaý usynylady. Daýly jaǵdaı týyndaǵan kezde oryndaýshyǵa jazbasha shaǵymdy ýaqytyly jiberý qajet. Quqyqtar buzylǵan jaǵdaıda tutynýshy saýda jáne tutynýshylardyń quqyqtaryn qorǵaý departamentine keńes alý jáne buzylǵan quqyqtardy qalpyna keltirýge járdemdesý úshin júginýge quqyly».