Астанада тапсырыс беру пунктінің 19 жастағы қызметкері маркетплейс тауарларын 14,9 млн теңгеден астам сомаға ұрлағаны үшін кінәлі деп танылып, бес жылға бас бостандығынан айырылды, деп хабарлайды infohub.kz сайты.
Алаяқтық схемасының мән-жайын елорда прокуратурасы әңгімелеп берді. Жас қызметкер маркетплейс қосымшасында түрлі тауарға — алтын бұйымдарға, киімге, азық-түлікке және басқа да заттарға тапсырыс рәсімдеген. Оларды алып, тапсырылған затты жасырын түрде ұрлап, орнына басқа бұйымдарды қойып немесе қоймаға мүлдем өзге заттарды қайтарып отырған.
Қадағалау органы ең айқын эпизодты келтірді: «Қызметкер маркетплейс қосымшасында түрлі тауарға: алтын бұйымдарға, киімге, азық-түлікке және басқаларына тапсырыс рәсімдеген. Оларды алып, жасырын түрде ұрлап, орнына басқа заттарды қойып немесе қоймаға өзге бұйымдарды қайтарып отырған. Мысалы, 182 мың теңгеге алтын сырға тапсырыс беріп, оларды бижутерияға ауыстырып, сатушыға қайтарған».
Осылайша ер адам жалпы құны 14,9 млн теңгеден асатын 195 бірлік тауарды ұрлаған.
Сот үкімімен оған 5 жылға бас бостандығынан айыру жазасы тағайындалды. Жәбірленушінің шығынды өтеу туралы азаматтық талап-арызы қанағаттандырылды. Үкім заңды күшіне енді.