Astanada jol jóndeý jumystaryna baılanysty aldaǵy kúnderi Tilendıev dańǵylynda kólik qozǵalysyna shekteý engiziledi, dep habarlaıdy infohub.kz saıty.
Astana ákimdiginiń Telegram-arnasynda qala turǵyndary men qonaqtaryn N. Tilendıev dańǵylynyń Barshyn kóshesinen Kóktal kóshesine deıingi bóliginde qozǵalystyń ishinara jabylatyny týraly eskertti. Shekteýler 17 jáne 18 shildede jol tóseminiń ústińgi qabatyn tóseý jumystaryna baılanysty engiziledi.
Avtokólik qozǵalysy bir jaǵynan uıymdastyrylatyny atap ótildi.
«Júrgizýshiler men jaıaý júrginshilerdi baǵyttaryn aldyn ala josparlap, qozǵalysty uıymdastyrýdaǵy yqtımal ózgeristerdi eskerýge shaqyramyz. Qaýipsizdikti qamtamasyz etý jáne qolaısyzdyqty azaıtý úshin ýaqytsha jol belgileri men kórsetkishter ornatylady», — delingen ákimdik habarlamasynda.