Qazaqstan astanasynda 29 jastaǵy er adam kólikke qatysty alaıaqtyq jasady degen kúdikpen ustaldy. Ol bóten Toyota Camry-di arzan baǵaǵa satyp, ıesine 11,5 mln teńge kóleminde shyǵyn keltirgen, dep habarlaıdy infohub.kz saıty.
Anyqtalǵandaı, kúdikti tanysynyń senimine kirip, onyń aq tústi Toyota Camry kóligin sýretke túsirip alǵan. Keıin bul sýretterdi basqa tanysyna kólikti satý usynysy retinde jiberip, kóliktiń ózine tıesili emestigin jáne ony satýǵa quqyǵy joqtyǵyn jasyrǵan. Nátıjesinde kólik ıesine kórsetilgen mólsherde materıaldyq shyǵyn keltirilgen.
Jábirlenýshi polısıaǵa aryzdanǵannan keıin, jedel-izdestirý is-sharalary barysynda kúdikti anyqtalyp, ustaldy. Qazirgi ýaqytta ol ýaqytsha ustaý ızolátoryna qamaldy. Osy faktige qatysty sotqa deıingi tergeý júrgizilýde.
İshki ister mınıstrligi azamattardy saq bolýǵa jáne kólik quralyn úshinshi tulǵalarǵa berý aldynda barlyq mámilelerdi zańnama talaptaryna sáıkes resimdeýge shaqyrdy. Tipti tanystar arasyndaǵy kelisimder de qujattyq túrde bekitilýi tıis. Tek senimge negizdelgen aýyzsha kelisimder azamattardyń alaıaqtardyń qurbany bolýyna ákelýi múmkin.