Astana turǵyndary áleýmettik jelilerde beımálim sımptomdary bar syrqatqa jappaı shaǵymdanýda: jótelden bólek, qala turǵyndary aýyzdyń qurǵaýyn jáne kózdiń qyshýyn baıqaǵan, dep habarlaıdy infohub.kz saıty.
Threads jelisindegi aaliya_23 laqap atymen tirkelgen qoldanýshy qala boıynsha «vırýs júrgenin» jazdy. «Álsizdik, sırek qurǵaq jótel, toqtaýsyz túshkirý jáne kóz qyshýy. Kimde osylaı? Kúzde alergıa bolýy ekitalaı shyǵar?» — dep jazdy qazaqstandyq.
Pikirlerde elorda turǵyndary uqsas sımptomdardy baıqaǵandaryn rastaıdy. Sonymen qatar qala turǵyndary muny alergıa dep senbeıtindikterin aıtyp, jańa vırýstyń paıda bolýyn boljaýda.
NUR.KZ tilshisine Densaýlyq saqtaý mınıstrliginiń Sanıtarlyq-epıdemıologıalyq baqylaý komıteti habarlaǵandaı, qyrkúıek aıynyń basynan bastap Qazaqstanda kúzgi-qysqy maýsymǵa daıyndyq aıasynda JRVI, tumaý jáne COVID-19-ǵa epıdemıologıalyq monıtorıń júrgizilýde.
«Bul kezeńde aýa raıynyń kúrt ózgerýi de oryn alady, bul respıratorlyq vırýstyq ınfeksıalardyń taralýyna yqpal etýi múmkin. Qazirgi tańda buryn belgisiz jańa vırýstar anyqtalǵan joq. Sonymen qatar bir sımptomdar boıynsha naqty vırýsty anyqtaý múmkin emes. Sondyqtan aýrý belgileri paıda bolǵan kezde ózin-ózi emdeýmen aınalyspaı, tekserý men maman keńesin alý úshin medısınalyq uıymǵa júginý qajet», — dedi vedomstvoda.
Aldyn alý sharasy retinde azamattarǵa úı-jaılardy júıeli túrde jeldetý, qol tazalyǵyn saqtaý, aýrý belgileri bar adamdarmen tyǵyz baılanystan aýlaq bolý, qajet bolǵan jaǵdaıda adam kóp jınalatyn jerlerde maska kıý jáne JRVI sımptomdary paıda bolǵanda múmkindiginshe úıde qalý usynylady.
«Joǵary temperatýra, aıqyn álsizdik, tynys alýdyń qıyndaýy nemese jalpy jaǵdaıdyń nasharlaýy kezinde der kezinde medısınalyq kómekke júginý qajet», — dep eske saldy Komıtette.