Qazaqstan astanasynda Antalıadan kelgen ushaqta buzaqylyq jasaǵan 44 jastaǵy er adam qamaýǵa alyndy. Oqıǵa ushý kezinde bolǵan, al ushaq qonǵan soń jolaýshy polısıa qyzmetkerlerine qarsylyq kórsetken, dep habarlaıdy infohub.kz saıty.
Kólik polısıasy departamentiniń málimetinshe, jolaýshy masań kúıde bolǵan. Áýede ol agressıvti minez kórsete bastaǵan: balaǵattap, basqa jolaýshylarǵa kedergi keltirgen. Astana áýejaıyna qonǵan soń buzaqyny kólik polıseılerine tapsyrǵan.
Polısıa bólmesine jetkizý kezinde er adam qyzmetkerlerdiń zańdy talaptaryn oryndaýdan bas tartyp, qarsylyq kórsetken. Polıseıler arnaıy qural — qol kisenin qoldanýǵa májbúr bolǵan.
Buzaqyǵa qatysty аlkogóldik ishimdik ishý nemese qoǵamdyq orynda masań kúıde júrý, sondaı-aq usaq buzaqylyq jáne quqyq qorǵaý organy qyzmetkeriniń zańdy ókimine baǵynbaý faktileri boıynsha ákimshilik materıaldar jasalǵan. Barlyq materıaldar sotqa jiberilgen.
«İsti qaraý qorytyndysy boıynsha sot er adamdy kináli dep tanyp, oǵan 10 táýlikke qamaý jazasyn taǵaıyndady», — dep habarlady kólik polısıasy departamentinde.
Vedomstvo jolaýshylarǵa ushaq bortynda tártip saqtaý qajettigin eskertti. Polısıa ekıpaj jumysyna kedergi keltiretin nemese aınaladaǵylarǵa qaýip tóndiretin áreketter jaýapkershilikke ákelýi múmkin ekenin atap ótti.
«Este saqtaý mańyzdy: ushý qaýipsizdigi tek ekıpaj ben áýejaı qyzmetkerlerine ǵana emes, árbir jolaýshynyń minez-qulqyna da baılanysty», — dep atap ótti vedomstvoda.
Buǵan deıin taǵy bir oqıǵa týraly habarlanǵan bolatyn: Kýala-Lýmpýrdan Kochıge ushqan Batik Air reısiniń jolaýshysy ushý kezinde avarıalyq shyǵýdy ashýǵa tyrysqan. 36 jastaǵy Djamshır Atanıkkala qonǵan soń ustalyp, keıin polısıa onyń áreketteri jolaýshylardyń ómirine qaýip tóndirýi múmkin bolǵandyqtan, aıyptaýǵa adam óltirýge oqtalýdy qosqan.