Astananyń ákimshilik quqyq buzýshylyqtar jónindegi mamandandyrylǵan aýdanaralyq soty áleýmettik jelide bylapırat sózder aıtyp, esirtki zatyn kórsetip tutynǵan beınejazba jarıalaǵan er adamnyń isin qarady. Sot otyrysynyń qorytyndysy boıynsha oǵan 20 táýlikke qamaý túrindegi ákimshilik jaza taǵaıyndaldy, dep habarlaıdy infohub.kz saıty.
Astana sottarynyń resmı Telegram-arnasynda jazylǵandaı, 2026 jylǵy 19 qyrkúıekte sot Ákimshilik quqyq buzýshylyq týraly kodekstiń 434-babynyń 1-bóligi (usaq buzaqylyq) jáne 440-1-babynyń 1-bóligi (esirtki zatyn medısınalyq emes maqsatta tutyný) boıynsha materıaldardy qarady.
Otyrys barysynda er adam óziniń áleýmettik jelidegi paraqshasynda beınejazba jarıalaǵany, onda ózin dóreki ustap, bylapırat sózder aıtyp, ózine kelmegen klıentke qarata sóılegeni anyqtaldy. Sonymen qatar vıdeoda ol jasyl tústi zattyń janǵan býyn kórsetip demalǵan.
2026 jylǵy 18 qyrkúıekte medısınalyq kýálandyrý nátıjesinde er adamnyń esirtki zatyn medısınalyq emes maqsatta tutynǵany anyqtaldy. Quqyq buzýshylyqtardy Astana qalalyq polısıa departamenti 2026 jylǵy 18 qyrkúıekte áleýmettik jelilerdi monıtorıńileý barysynda anyqtaǵan.
Sot otyrysynda er adam kinásin moıyndady. Ol beınejazbany jazdyń ortasynda jarıalaǵanyn, naqty kúnin esine túsire almaıtynyn túsindirdi. Esirtki zatyn ustalǵanǵa deıin 3-4 kún buryn tutynǵanyn, kelesi kúni polısıa bólimine jetkizilgenin aıtty.
Jasalǵan quqyq buzýshylyqtardyń mán-jaıy is materıaldarymen, onyń ishinde er adamnyń óz túsiniktemelerimen, ákimshilik quqyq buzýshylyq týraly hattamalarmen, beınejazbamen jáne medısınalyq kýálandyrý qorytyndysymen rastaldy.
Jasalǵan quqyq buzýshylyqtardyń jıyntyǵyn eskere otyryp, er adamǵa túpkilikti 20 táýlikke qamaý túrindegi ákimshilik jaza taǵaıyndaldy. Qaýly zańdy kúshine engen joq.