Astana turǵyny úıiniń janynda túngi ýaqytta feıerverk atyp, ákimshilik jaýapkershilikke tartyldy, dep habarlaıdy infohub.kz saıty.
Astana qalasy sottarynyń baspasóz qyzmetiniń málimetinshe, 4 qyrkúıekte Astana qalasynyń Ákimshilik quqyq buzýshylyqtar jónindegi mamandandyrylǵan aýdanaralyq soty Ákimshilik quqyq buzýshylyq týraly kodekstiń 434-babynyń 1-bóligine (usaq buzaqylyq) sáıkes azamat S.-ǵa qatysty isti qarady.
İs materıaldary boıynsha, 2026 jylǵy 4 qyrkúıekte saǵat 00:03 shamasynda azamat S. úıiniń janyndaǵy qoǵamdyq orynda birneshe ret pırotehnıkalyq buıymdardy atyp, kúshti dybystyq jáne jaryq effektilerin týdyrǵan. Osy áreketterimen ol qoǵamdyq tártip pen azamattardyń tynyshtyǵyn buzyp, aınalasyndaǵylarǵa qurmetsizdik kórsetken.
Sot otyrysynda S. kinásin tolyq moıyndap, istegenine ókinetinin bildirdi. Quqyq buzýshylyq jaǵdaıy oqıǵanyń beınejazbasymen rastaldy.
ÁQBtK-niń 434-baby 1-bóliginiń sanksıasy 20 AEK (86 500 teńge) mólsherinde aıyppul, 20-dan 60 saǵatqa deıingi merzimge qoǵamdyq jumystar nemese 5 táýlikten 10 táýlikke deıingi merzimge ákimshilik qamaýǵa alýdy kózdeıdi.
Quqyq buzýshylyq sıpatyn jáne onyń qoǵamdyq tártipti buzýǵa baǵyttalǵanyn eskere otyryp, sot S.-ǵa bes táýlik merzimge ákimshilik qamaýǵa alý túrindegi ákimshilik jaza taǵaıyndady. Qaýly zańdy kúshine engen joq.