Volkswagen Polo kóliginiń ıesi kóshede tanysymen sóılesip turǵanda, qulpy ashylmaǵan kólikten quny shamamen 1 mıllıon teńge bolatyn lúks Valentino sómkesi urlandy. Oqıǵa Astananyń Shubar shaǵyn aýdanynda qarańǵy ýaqytta bolǵan. Bul týraly infohub.kz habarlaıdy.
Polisia.kz portalynyń málimetinshe, qylmysker qulpy ashylmaǵan kólikke baıqatpaı jaqyndap, aldyńǵy jolaýshy ornynan sómkeni alyp ketken. Sómkeniń ishinde 60 myń teńge jáne jeke qujattar bolǵan.
Jedel-izdestirý sharalarynyń nátıjesinde polısıa qyzmetkerleri kúdiktiniń jeke basyn anyqtap, ustady. Urlyqtan keıin kelesi kúni ol urlanǵan sómkeni jasyryp, aqshasyn jumsap úlgergen. Zattaı dálel alynyp, zańdy ıesine qaıtaryldy.
Ustalǵan adamnyń buryn da osyǵan uqsas qylmystar úshin jaýapkershilikke tartylǵany anyqtaldy. Qazirgi ýaqytta ol ýaqytsha ustaý ızolátoryna qamaldy. Urlyq faktisi boıynsha sotqa deıingi tergeý júrgizilýde.
Quqyq qorǵaý organdary qylmyskerlerdiń kólik ıeleriniń qysqa merzimdi abaısyzdyǵyn jıi paıdalanatynyn eskertti. Olar kólik salonynda sómke, aqsha, qujat jáne basqa da baǵaly zattardy kózge kórinetin jerde qaldyrmaýǵa shaqyrdy. Tipti birneshe mınýtqa ketseńiz de, kóliktiń esikteri men terezelerin mindetti túrde jaýyp, dabylǵa qoıý kerek.