Astanada polısıa zańsyz topyraq alýǵa qarsy kúresti jalǵastyrýda. Bul qorshaǵan ortaǵa úlken zıan keltirip, tabıǵı landshaftty ózgertedi. Nura aýdanynda taǵy bir zańsyz jer qoınaýyn paıdalaný faktisi anyqtaldy. Onda topyraqty shyǵarý úshin júk kólikteri men arnaıy tehnıka paıdalanylǵan. Tekserý qorytyndysy boıynsha barlyq kólik quraldary arnaıy turaqqa jiberildi. Bul týraly infohub.kz habarlaıdy.
Elordada zańsyz topyraq alý derekterin anyqtaý jáne jolyn kesý boıynsha júıeli jumys jalǵasýda. Polısıa mundaı buzýshylyqtar qorshaǵan ortaǵa eleýli zıan keltirip, tabıǵı landshaftty ózgertetinin jáne qalanyń ekologıalyq jaǵdaıyna keri áser etetinin atap ótti.
Quqyq qorǵaý organdarynyń málimetinshe, jer ýchaskelerin óz betinshe ıgerý tereń shuńqyrlardyń paıda bolýyna ákeledi. Olar ýaqyt óte kele sýǵa tolyp, jerdiń tabıǵı bederi buzylady, topyraqtyń jaǵdaıy nasharlaıdy jáne qosymsha ekologıalyq qaýipter týyndaıdy.
«"102" arnasyna kelip túsken habarlamadan keıin zańsyz jer qoınaýyn paıdalanýdyń taǵy bir faktisi anyqtaldy. Málimet boıynsha, zańsyz topyraq óndirý jáne shyǵarý Nura aýdanynda, Qarqaraly kóshesine jaqyn ornalasqan atshabar mańynda júrgizilgen», — dedi elordalyq polısıa departamentinde.
Oqıǵa ornyna kelgen polısıa qyzmetkerleri arnaıy tehnıka men júk kólikterin paıdalanyp topyraqty tıeý jáne tasymaldaýmen aınalysqan bir top adamdy anyqtady.
«Tekserý barysynda polıseıler 22, 26 jáne 39 jastaǵy azamattar basqarǵan úsh Shacman júk kóligin anyqtady. Sondaı-aq, orynnan memlekettik tirkeý nomeri joq shynjyr tabandy ekskavator tabyldy. Arnaıy tehnıkany 30 jastaǵy júrgizýshi basqarǵan. Taǵy bir Chery Tiggo kóligi anyqtalyp, ony 35 jastaǵy azamat júrgizgen», — dedi Astana polısıasynda.
Quqyq buzýshylyq jasaý kezinde paıdalanylǵan barlyq kólik quraldary komýnaldyq arnaıy turaqqa qamaldy. Zańsyz jer qoınaýyn paıdalaný faktisi boıynsha qosymsha tekserý júrgizilýde. Kináli tulǵalar Qazaqstan Respýblıkasynyń qoldanystaǵy zańnamasyna sáıkes jaýapkershilikke tartylady.
Polısıa mundaı buzýshylyqtardy anyqtaý jumysy turaqty negizde jalǵasatynyn atap ótti. Quqyq qorǵaýshylar azamattar men uıymdardy jer qoınaýyn paıdalaný salasyndaǵy zańnama talaptaryn saqtaýǵa, abattandyrý erejelerin oryndaýǵa jáne qorshaǵan ortaǵa uqypty qaraýǵa shaqyrdy.