Astanada beıtanys er adam bóten páterge kirip, onda uıyqtap jatqan úsh kishkentaı balanyń qasynda sheshinip jatyp qalǵan. Keıin úıge oralǵan ákesin uryp-soqqan. Bul týraly infohub.kz saıty habarlaıdy.
Oqıǵa 2 qyrkúıekte bolǵan. Ony Threads áleýmettik jelisindegi madina_n__s degen paıdalanýshy áńgimelep bergen. Onyń aıtýynsha, ápkesi Astanada úsh kishkentaı balasymen — 6, 4 jáne 2 jastaǵy balalarymen turady. Tańǵy 10:35-te áıel jumysqa ketken, balalar úıde uıyqtap qalǵan. Kúıeýi jumystan shyǵyp, jaqynda úıge keletinin aıtqandyqtan, ol páterden sabyrly túrde shyqqan.
Shamamen 11:00-de ápkesiniń kúıeýi úıge kelip, esik aldynda bóten aıaq kıimdi kórgen, al kireberis esiktiń tutqasy synǵan eken. Aldymen ol páterdi nemese qabatty shatastyrdym ba dep oılaǵan, biraq syrtqa shyǵyp, óz páteriniń janynda turǵanyn túsingen. Esikti ashyp, ishte múldem beıtanys jalańash er adamnyń úsh kishkentaı balanyń qasynda uıyqtap jatqanyn kórgen.
Ápkesiniń kúıeýi áýeli beıtanys adamdy tynysh oıatyp, balalar shoshymas úshin páterden shyǵarýǵa tyrysqan. Alaıda ol kózin ashyp, birden uryp, soqqy bere bastaǵan. Ápkesiniń kúıeýi qorǵanýǵa májbúr bolǵan. Úsh balanyń ákesi jaraqat alǵany belgili boldy.
«Barlyǵy balalardyń kózinshe boldy. Olar qatty shoshyp, jylap, kómekke shaqyra bastady. Aıqaıǵa kórshiler júgirip keldi. Olar balalardy ózderine alyp ketip, polısıa shaqyrdy. Sodan keıin ápkeme qońyraý shalyp, dereý úıge kelýin aıtty», — delingen jazbada.
NUR.KZ tilshisine Astana qalalyq polısıa departamentinen habarlaǵandaı, polısıaǵa páterde beıtanys er adam bar ekeni týraly habarlama túsken. Oqıǵa ornyna polısıa qyzmetkerleri kelgen.
«Tekserý barysynda oqıǵaǵa qatysýshylardyń barlyǵy anyqtaldy. Aldyn ala belgili bolǵandaı, ishimdik ishken kúıdegi er adam kórshi páterge kirip ketken. Balalar arasynda zardap shekkender joq. Qazirgi tańda sotqa deıingi tergeý júrgizilip, bolǵan oqıǵanyń barlyq mán-jaıy anyqtalýda», — delingen habarlamada.