Astana qalalyq jedel járdem stansasynyń burynǵy dırektory búdjetten 443 mln teńgeden astam qarajatty jymqyrǵany úshin 9 jylǵa bas bostandyǵynan aıyryldy. Onymen birge taǵy eki burynǵy qyzmetker de naqty merzimge sottaldy. Bul týraly infohub.kz saıty habarlaıdy.
28 shildede úkimdi Astana qylmystyq ister jónindegi aýdanaralyq soty jarıalady.
İs materıaldaryna sáıkes, 2020-2023 jyldar aralyǵynda, Qazaqstandaǵy tótenshe jaǵdaı rejımi kezinde, stansa basshysy kóliktik qamtamasyz etý bóliminiń bastyǵy jáne bas mehanıkpen birge aqsha jymqyrý sqemasyn uıymdastyrǵan. Jedel járdem kólikterin jóndeýge únemdeý jáne tez jóndeý degen syltaýmen kásiporynda menshikti tehnıkalyq qyzmet kórsetý stansasyn ashqan, – delingen sottyń baspasóz qyzmetiniń habarlamasynda.
Aıyptalýshylar sanıtarlyq kólikterge arnalǵan qosalqy bólshekterdi zańsyz esepten shyǵaryp, naqty eshqandaı jumys atqarmaǵan merdigermen jóndeý shartyn jasasqan. Nátıjesinde kásiporynǵa 443 mln teńgeden astam zalal keltirilgen. Sot anyqtaǵandaı, bul aqsha ıemdenilgen.
Sonymen qatar, stansanyń taǵy bir qyzmetkeri 2023 jyly qyzmet babyn paıdalanyp, kásiporyn múlkin 268 myń teńgeden astam somaǵa jymqyrǵan.
Burynǵy dırektor jáne onyń eki áriptesi kinálaryn moıyndamaı, aqtaýdy suraǵan. Alaıda sot olardyń qatystylyǵy kýálardyń aıǵaqtarymen, saraptama qorytyndylarymen, zattaı dáleldemelermen jáne istiń basqa da materıaldarymen dáleldengen degen qorytyndyǵa keldi. Sot qylmystyń tótenshe jaǵdaı rejımi kezinde jasalǵanyn aýyrlatatyn mán-jaı dep tanydy. Bul rette 443 mln teńge kólemindegi zalal áli ótelmegen.
Nátıjesinde stansanyń burynǵy dırektory memlekettik qyzmette laýazymdardy atqarýǵa ómir boıy tyıym salyna otyryp, 9 jylǵa bas bostandyǵynan aıyryldy. Kóliktik qamtamasyz etý bóliminiń bastyǵy men bas mehanıkke de dál osyndaı ómir boıy tyıym salyna otyryp, 8 jyldan bas bostandyǵynan aıyrý jazasy kesildi. Tórtinshi aıyptalýshy 2 jylǵa bas bostandyǵyn shekteý jazasyn aldy, alaıda amnıstıa boıynsha jazadan bosatyldy. Sot onyń kinásin moıyndaǵanyn, keltirilgen zalaldy ótegenin jáne jábirlenýshi tarappen tatýlasqanyn eskerdi.
Sondaı-aq sot sottalǵandardan jábirlenýshiniń paıdasyna 443 mln teńgeden astam óndirip alý týraly azamattyq talapty tolyq qanaǵattandyrdy. Úkim áli zańdy kúshine engen joq.
Buǵan deıin «Kýrsıv» basylymy Bas prokýratýranyń 80 mln teńgeden astam qarajatty urlaǵan býhgalterge qatysty amnıstıanyń kúshin joıýǵa qol jetkizgeni týraly jazǵan bolatyn.