Astanadaǵy Ulttyq ǵylymı medısınalyq ortalyǵynyń (UMC) dárigerleri 60 jastaǵy er adamǵa júrek transplantasıasyn sátti jasady. Marqumnyń otbasy kelisim bergennen keıin donorlyq múshe birneshe saǵat ishinde jetkizilip, otyrǵyzyldy, dep habarlaıdy infohub.kz.
Densaýlyq saqtaý mınıstrliginiń naqtylaýynsha, 14 shildeden 15 shildege qaraǵan túni Kópbeıindi medısınalyq ortalyqta áleýetti donor anyqtaldy. Týystary kelisim bergennen keıin donorlyq proses tolyq uıymdastyryldy. Resıpıent – 1966 jyly týǵan er adam, uzaq ýaqyt kútý tiziminde bolǵan. Dárigerler onyń jaǵdaıy otadan keıingi kezeńge sáıkes keletinin aıtady.
Mınıstrlik donordyń otbasyna qabyldanǵan sheshim úshin, transplantasıany júrgizgen barlyq dárigerlerge, sondaı-aq júrekti elordaǵa jedel jetkizgen sanıtarlyq avıasıa qyzmetkerlerine alǵys bildirdi.
Vedomstvonyń málimetinshe, Qazaqstanda ómirlik mańyzy bar múshelerdi transplantasıalaýdy 4,7 myńnan astam adam, onyń ishinde 125 bala kútip otyr. Olardyń ishinde búırek transplantasıasy 4 208 naýqasqa, baýyr – 293, júrek – 208, ókpe – 30, ókpe-júrek kesheni – 5 adamǵa qajet. «Árbir qaıtys bolǵannan keıingi donorlyqqa kelisim – transplantasıa jalǵyz emdeý tásili bolyp otyrǵan adamdardyń ómirin saqtaý múmkindigi», – dep atap ótti mınıstrlikte.
Buǵan deıin Almatydaǵy Kardıologıa jáne ishki aýrýlar ǵylymı-zertteý ınstıtýtynda aýyr mıtraldy regýrgıtasıasy bar naýqastarǵa TEER tehnologıasy boıynsha birqatar az ınvazıvti otalar jasalǵany habarlanǵan bolatyn. Aralasýlar keýde qýysyn ashpaı jáne jasandy qan aınalymynsyz jumys istep turǵan júrekte júrgizilgen.