Astanada páter satýǵa baılanysty alaıaqtyq isi boıynsha sot prosesi aıaqtaldy. Alaıaqtardyń qurbany 51 adam boldy, al jalpy zalal somasy 3 mlrd teńgeden asty, dep habarlaıdy infohub.kz saıty.
Astana sottarynyń baspasóz qyzmetinde aıtylǵandaı, is boıynsha aıyptalýshylar — B., E., Ch., D. — aldyn ala sgovor jasaǵan adamdar tobynyń quramynda, qyzmettik jaǵdaıyn paıdalanyp, erekshe iri mólsherde, aldaý arqyly bóten múlikti ıemdený, ıaǵnı alaıaqtyq jasaýǵa uıymdastyrýshylyq jáne kómektesý faktileri boıynsha aıyptaldy. Sonymen qatar, olarǵa aldyn ala sgovor jasaǵan adamdar tobynyń quramynda, qyzmettik jaǵdaıyn paıdalanyp, erekshe iri mólsherde senip tapsyrylǵan bóten múlikti ysyrap etý, sondaı-aq aqparatty jasyryn alý úshin arnaıy tehnıkalyq quraldardy zańsyz satyp alý jáne paıdalaný aıyptary taǵyldy.
Aıyptaý qorytyndysyna sáıkes, sottalýshylar páterlerdi, turǵyn emes úı-jaılardy jáne turaq oryndaryn satý syltaýymen azamattardan qolma-qol jáne qolma-qol emes túrde aqshany jeke shottaryna alǵan. Nátıjesinde 51 zardap shegýshige erekshe iri mólsherde — 3 mlrd teńgeden astam zalal keltirildi. Sonymen qatar, alaıaqtar jalǵan satyp alý-satý sharttaryn jasap, JSHS qarajatyn ıemdengen, al klıentterden alynǵan aqsha (3 mlrd teńgeden astam) kompanıaǵa túspegen, bul da erekshe iri mólsherde zalal keltirgen.
Sottalýshylardyń kinási zardap shegýshiler men kýágerlerdiń aıǵaqtarymen, sarapshylardyń qorytyndylarymen, jasyryn tergeý áreketteriniń materıaldarymen, zattaı dáleldemelermen jáne istiń basqa da materıaldarymen rastaldy. Prokýror memlekettik aıyptaýdy qoldap, zańǵa sáıkes jaza taǵaıyndaýdy surady. Zardap shegýshiler zalaldyń ótelmeýin eskere otyryp, qatań úkim shyǵarýdy talap etti.
Sottalýshylar men olardyń qorǵaýshylary aıyptaýmen kelispeı, aqtalýdy surady. Alaıda sot qylmystyń aýyrlyǵyn, zalaldyń ótelmeýin jáne kináni moıyndamaýdy eskere otyryp, 8 jáne 9 jylǵa bas bostandyǵynan aıyrý jazasyn taǵaıyndady, sondaı-aq jyljymaıtyn múlikti satýǵa baılanysty qyzmetpen aınalysý quqyǵynan 10 jylǵa aıyrdy. Úkim zańdy kúshine engen joq.