Astanada jeńil relsti kólik (LRT) tireýishterin qalalyq galereıaǵa aınaldyrý usynyldy, alaıda bul bastama qala turǵyndarynyń arasynda túrli pikir týdyrdy, dep habarlaıdy infohub.kz saıty.
Threads áleýmettik jelisindegi @tleuzhanovsaken paıdalanýshysy jergilikti sýretshiler men jas avtorlardy tarta otyryp, LRT tireýishterin bezendirý boıynsha pılottyq jobany bastaýdy usyndy. Onyń oıynsha, eskızder aldyn ala kelisilip, sýretter sapaly oryndalýy tıis.
Mysal retinde astanalyq birneshe bezendirý nusqasyn kórsetti. Olardyń birinde tireýishter ulttyq stıldegi qyz portretimen, búrkit beınesimen, tabıǵat kórinisterimen jáne oıý-órnektermen bezendirilgen. Avtor jekelegen sýrettermen shektelmeı, LRT-niń beton qurylymdarynyń kádimgi kórinisin ózgerte alatyn tutas týyndylar toptamasyn jasaýdy usynady.
Alaıda pikirlerde bul ıdeıany bári qoldaı qoımady. Kóptegen astanalyqtar ashyq tústi sýretter qalany vızýaldy túrde shamadan tys júkteıtinin aıtty, keıbireýler tireýishterdi qazirgi qalpynda qaldyrǵandy jón kóredi.
«Ideıa jaqsy, biraq bolmaıdy. Tehnıkalyq sebeptermen tyıym salynǵan. Aqaýlar kórinbeı qalady», «Osy túrli-tústi daqtardyń bári kerek emes. Shynymen de shý», «Joq-joq, qoıyńdar. Bir tústileri durys», «Tireýishterge tıispeńder, júktemeńder. Jaqsy kórinbeıdi», «Bul ádemi emes, talǵamsyz», – dep jazady pikir qaldyrýshylar.
Qalanyń syrtqy kelbetinen bólek, basqa da máselelerge alańdaıtyndar tabyldy. Bir paıdalanýshynyń pikirinshe, ashyq sýretter júrgizýshilerdi alańdatyp, tireýishter fotosessıa ornyna aınalyp, joldarda qıyndyq týǵyzýy múmkin.
«Olardy qazirgi qalpynda qaldyryńdar. Sýretterdi ádettegideı úılerge salǵan durys. LRT-de júrgizýshilerdi alańdatady, jastar sýretke túsip, qozǵalysqa kedergi keltiredi. Paıdadan góri zıany kóp», – dep atap ótti komentator.
Degenmen keıbireýler ıdeıany qoldady. Bir paıdalanýshy tipti tireýishterge handar men batyrlardyń beınelerin salýdy usyndy. Biraq ázirge tek ıdeıa men vızýaldy eskızder týraly ǵana aıtylyp otyr. Astana ákimdigi LRT tireýishterin bezendirý týraly resmı sheshimdi áli jarıalaǵan joq.
Buǵan deıin Kursiv LifeStyle Almatydaǵy Esentaı ózeniniń jaǵalaýyn ashyq tústi sýrettermen bezendirip, aınalasyndaǵy aýmaqty retke keltire bastaǵanyn jazǵan edi. Alaıda jańa bezendirý bárine unaı qoımady. Keıbir turǵyndar sýretterdi synǵa aldy. Biz sýretterdiń qalaı jasalatynyn jáne jańartý tóńireginde nelikten daý týyndaǵanyn anyqtadyq.