Астероид бетінде ядролық жарылыс жасалатын жақты дұрыс таңдамау оны орбитадан ығыстыру тиімділігін шамамен бес есеге төмендетуі мүмкін. Себебі ғарыш денесінің бедері күрделі. Бұны Сандиа ұлттық зертханаларының зерттеушілері анықтады, деп жазады ScienceDaily, деп хабарлайды infohub.kz сайты.
Бүгінде ядролық жарылыс планетаны қорғаудың ең перспективалы әдістерінің бірі саналады. Рентген сәулесінің қуатты жарқылы аспан денесінің бетіндегі жыныстың бір бөлігін буландырып, реактивті тарту күшін тудырады. Осы күш қауіпті нысанның траекториясын өзгертуге тиіс. Алайда Icarus журналында жарияланған еңбекте физиктер астероид пішіні планетаны құтқару мен апат арасындағы шешуші факторға айналуы мүмкін екенін дәлелдеді. Мінсіз шарлардан өзгеше, нақты астероидтардың бедері күрделі: ойыстар, қырқалар және асимметриялық дөңестер бар.
Нейтан Мур басқарған физиктер тобы ALEGRA мен SPARTA алгоритмдерін біріктіріп, астероидтарды ығыстырудың компьютерлік моделін құрды. Жаңа бағдарламалық кешен бұрынғы баламалардан 1600 есе жылдам жұмыс істейді. Ол аспан денелерінің дәл үш өлшемді суреттерін жүктеп, заттың булануының жылу карталарын, импульс параметрлерін, жыныстың бұзылуын және нысанның айналуын есептеуге мүмкіндік береді. Бұған дейінгі модельдер суперкомпьютер қуатына тым талапшыл болып, беттің біркелкі еместігін ескермеген.
Модельдеу әсер ету нүктесіне аса сезімталдықты көрсетті. Бір жағынан сәулелендіргенде астероид жылдамдығы секундына 3,9 миллиметрге өзгерсе, екінші бағыттан жарылыс жасағанда бар болғаны секундына 0,8 миллиметрге өзгерді. Бұл бес есе айырма береді. Соққы бұрышы өзгергенде нысанның айналу жылдамдығы 17 есеге дейін ерекшеленді. Нақты жағдайда есептегі қате орбитаның жеткіліксіз ығысуына не алып дене́нің қауіпті сынықтарға жарылуына әкелуі мүмкін. Сәтті миссия үшін астрономдарға дененің егжей-тегжейлі пішінін алдын ала алып, зарядты зергерлік дәлдікпен бағыттау қажет болады.