Nıls Bor ınstıtýtynyń zertteýshisi Iýlı Kıl Holm men DTU Space ǵalymy Sara Pırson bastaǵan halyqaralyq zertteý toby alǵash ret bizdiń galaktıkadan tys jerde shar tárizdi shoǵyrdan taraǵan juldyz aǵynyn tirkedi. Jumys nátıjeleri "Nature" ǵylymı jýrnalynda jarıalandy. Bul ashylym Álem massasyn zertteýdiń jańa ádisiniń tıimdiligin rastady, dep habarlaıdy infohub.kz saıty.
Juldyz aǵyny — ıe galaktıkanyń tartylys kúshi áserinen tyǵyz shar tárizdi shoǵyrdan sozylyp shyqqan uzyn ári jińishke juldyzdar shleıfi. Jaryǵy óte álsiz bolǵandyqtan, mundaı qurylymdar buryn tek Qus jolynda ǵana zerttelip kelgen. Bul nysandy jaryǵy aıryqsha tómen últradıffýzıalyq UGC9050-Dw1 galaktıkasynyń ishinen baıqaý múmkin boldy.
Juldyz aǵyndarynyń pishini men qozǵalysy gravıtasıaǵa tikeleı táýeldi bolǵandyqtan, olar jasyryn massanyń taralýyn zertteýdiń biregeı ındıkatoryna aınalady. Zertteý avtorlary UGC9050-Dw1 galaktıkasynyń jalpy massasyn jańadan eseptep, onda Álemdegi barlyq zattyń 85 paıyzyna deıingi úlesin quraıtyn qarańǵy materıanyń orasan zor mólsheri bar ekenin rastady.
Jumys avtorlarynyń aıtýynsha, bul ádisti Qus jolynan tys jerde sátti qoldaný astrofızıkaǵa keń múmkindikter ashady. Aldaǵy ýaqytta "Euclid" jáne "Nancy Grace Roman" ǵarysh teleskoptary basqa tıptegi galaktıkalardan osyndaı juldyz aǵyndaryn tabýǵa múmkindik beredi. Bul ǵalymdarǵa qarańǵy materıanyń tabıǵatyn ashýǵa jaqyndaýǵa kómektesedi.