Qazaqstandyq UFC ókili Asý Almabaev Real American Freestyle (RAF) lıgasynda amerıkandyq Djonnı Dıdjýlıýspen erkin kúres kezdesýin ótkizedi. Jekpe-jek 22 tamyzda Klıvlendtegi RAF12 týrnırinde ótedi, dep habarlaıdy infohub.kz saıty.
RAF basylymy: «Dıdjýlıýs úshin úıdegi kezdesý. Djonnı Dıdjýlıýs 22 tamyzda Klıvlendtegi RAF12 týrnırinde Asý Almabaevpen kezdesedi», – dep jazdy.
Almabaev UFC-diń eń jeńil salmaq dárejesindegi reıtıńte jetinshi orynda tur. Sońǵy jekpe-jeginde ol Bakýdegi UFC týrnırinde Charlz Djonsondy úshinshi raýndta Suloev stretch aýyrtý tásilimen jeńdi.
Djonnı Dıdjýlıýs – kásibı balýan. Stýdenttik kezinde Ogaıo shtatynyń ýnıversıteti úshin óner kórsetip, 115 jeńiske, 47 jeńiliske qol jetkizgen. NCAA chempıonatyna tórt ret iriktelip, Cliff Keen Las Vegas Invitational týrnırinde 60 kelige deıingi salmaqta jeńimpaz bolǵan. Qazirgi ýaqytta Dıdjýlıýs Klıvlend memlekettik ýnıversıtetiniń kúres komandasynda jattyqtyrýshynyń kómekshisi qyzmetin atqarady.
RAF12 týrnıri 22 tamyzda ótedi. Basty jekpe-jekte olımpıada chempıony Djordan Barroýz ben UFC ókili Shon Bredı kezdesedi. Birlesken basty jekpe-jekte kilemge UFC-diń burynǵy chempıondary Kolbı Kovıngton men Belal Mýhammad shyǵady.
Real American Freestyle (RAF) lıgasy – olımpıada chempıondary, jetekshi balýandar jáne tanymal aralas jekpe-jek ókilderi qatysatyn jekpe-jekter uıymdastyratyn amerıkandyq kásibı erkin kúres uıymy.