Atyraýdyń jańa ákimi bolyp buryn «Atyraý» áleýmettik-kásipkerlik korporasıasyn basqarǵan Danıar Tahanov taǵaıyndaldy, dep habarlaıdy infohub.kz saıty.
Oblys ákimdiginiń resmı Telegram-arnasynda málim bolǵandaı, Atyraý oblysynyń ákimi Bolat Aqsholaqovtyń ókimimen, Qazaqstan Respýblıkasy Prezıdenti Ákimshiliginiń jáne qalalyq máslıhat depýtattarynyń kelisimimen Atyraý ákimi laýazymyna Danıar Tahanov taǵaıyndaldy.
Ol 1985 jyly Atyraýda dúnıege kelgen. Beıjińdegi Qytaı munaı ýnıversıtetin «óndiristik-kommersıalyq basqarý» jáne «óndiristik ekonomıka» mamandyqtary boıynsha bitirgen. «Bolashaq» halyqaralyq stıpendıalyq baǵdarlamasynyń túlegi.
Eńbek jolyn 2009 jyly «QazQurylysServıs» AQ-da bastap, túrli laýazymdarda qyzmet atqarǵan. 2012 jyly Sinopec Engineering kompanıasynyń qazaqstandyq fılıalynda ınjener bolyp jumys istegen.
2012–2017 jyldary «Oral» ÁKK basqarma tóraǵasynyń orynbasary jáne «Atyrau Innovations» JSHS dırektory qyzmetterin atqarǵan.
2017 jyldan bastap «Atyraý» ÁKK» AQ-da basqarma tóraǵasynyń orynbasary jáne basqarma tóraǵasy bolyp jumys istegen. 2022 jyldyń mamyrynan bastap «Atyraý» áleýmettik-kásipkerlik korporasıasyn basqardy.
Oblys ákimi Bolat Aqsholaqov jańa qala ákimine turǵyndardyń ózekti máselelerin júıeli sheshý jumysyn jolǵa qoıýdy tapsyryp, jumyspen qamtý jáne jumysqa ornalastyrý, ınjenerlik ınfraqurylymdy damytý, káriz jáne energıamen jabdyqtaý júıelerin jańǵyrtý, jylytý maýsymynan ótý, turǵyndardy apatty turǵyn úılerden kóshirý, qoǵamdyq qaýipsizdikti qamtamasyz etý jáne qalany abattandyrý máselelerine erekshe nazar aýdarýdy tapsyrdy. Sondaı-aq óńir basshysy qalalyq máselelerdi sheshýde depýtattarmen jáne turǵyndarmen tyǵyz baılanysta bolý qajettigin atap ótti.
Eske salaıyq, bıylǵy maýsymda Atyraý ákiminiń orynbasary Meıirjan Muqasovtyń ustalǵany týraly aqparat paıda boldy. UQK-da sotqa deıingi tergeý júrgizilip jatqanyn habarlady.
Sondaı-aq jelide qala ákiminiń m.a. Tılek Mahýovtyń ustalǵany týraly aqparat tarady. UQK-da olar da sotqa deıingi tergeý júrgizip jatqanyn málimdedi.
Ustaýlar týraly jańalyqtardan keıin Atyraý turǵyndary qala ákimi Shakır Keıkınniń qaıda ekenin jáne nege kópshilik aldynda kórinbeı qalǵanyn suraı bastady. Atyraý ákimdiginde ol aýrý demalysynda bolǵanyn, biraq jumysqa shyǵyp, óz mindetterin atqaryp jatqanyn jaýap berdi. Eki apta buryn Shakır Keıkınniń Atyraý ákimi qyzmetinen ketkeni belgili boldy. Sodan keıin ol Instagram paraqshasynda post jarıalady.