2025 jyly Atyraý halyqaralyq áýejaıynyń shyǵyny 315,7 mln teńge qurady, al bir jyl buryn kásiporyn 616,5 mln teńge taza paıda tapqan edi. Osylaısha, qarjylyq nátıje 932,2 mln teńgege nasharlady, dep habarlaıdy infohub.kz.
Qyzmet kórsetýden túsken kiris pen onyń ózindik qunynyń aıyrmasy retinde esepteletin jalpy paıda 783,9 mln teńgege jetti. 2024 jylmen salystyrǵanda bul kórsetkish 16,1%-ǵa (933,9 mln teńgeden) tómendedi.
Áýejaıdyń ákimshilik jáne basqa da operasıalyq shyǵyndary edáýir ósti. Ákimshilik shyǵyndar 34%-ǵa – 817,8 mln teńgege, al basqa operasıalyq shyǵyndar 52,1%-ǵa – 188,1 mln teńgege artty.
Shyǵynnyń qalyptasýyna 351,2 mln teńge quraǵan qarjylyq shyǵyndar mańyzdy ról atqardy. 2024 jyly mundaı shyǵystar bolmaǵan. Olardy ishinara 226,3 mln teńge kólemindegi qarjylyq kirister ótedi, bul kórsetkish bir jylda alty eseden astam ósti.
Atyraý halyqaralyq áýejaıynyń 2025 jyldyń sońyndaǵy aktıvteri 15,8 mlrd teńge qurady, bul bir jylda 4,7 mlrd teńgege ósken. Mindettemeler 5,1 mlrd teńgege artyp, 8,2 mlrd teńgege jetti.
Eske salaıyq, Atyraý áýejaıyn túrik holdıńi YDA Holding basqarady. Dál osy kompanıa 2008 jyldan bastap Aqtaý áýejaıyn senimgerlik basqarý shartymen basqaryp keledi, sondaı-aq Túrkistan áýejaıynyń qurylysyna qatysqan. YDA Holding basqarý kezeńinde Aqtaý áýejaıynyń jolaýshy aǵyny jylyna 360 myńnan 1,2 mln jolaýshyǵa deıin ósti.
Budan buryn YDA Holding 2030 jylǵa qaraı Aqtaý áýejaıy arqyly júk tasymaly kólemin 100 myń tonnaǵa deıin arttyrýdy josparlap otyrǵany, al 2025 jyldyń qorytyndysy boıynsha bul kórsetkish 3 myń tonna bolǵany habarlanǵan edi.