Atyraý turǵyny jeke balabaqshalardyń biriniń qyzmetkerlerin bir jasar ulyna qatygezdik tanytty dep aıyptady, dep habarlaıdy infohub.kz saıty.
Áıeldiń aıtýynsha, balabaqshadan keıin balasynyń denesinen jaraqattar baıqaǵan. Osydan keıin otbasy beınebaqylaý kameralarynyń jazbalaryn berýdi suraǵan.
Ananyń aıtýynsha, beınejazbada tárbıeshiler balaǵa dóreki qaraıdy: qoldarynan tartady, edenge laqtyrady, basqa balalardyń arasynda qaraýsyz qaldyrady jáne oǵan kúsh qoldanady degen kúdik bar. Sondaı-aq ol ulynyń únemi ash kúıinde úıge oralatynyn, jylaıtynyn jáne qorqynyshty kúıde bolatynyn aıtty.
Áıeldiń sózinshe, balanyń qoltyq asty isingen, tistegen izderi, qulaǵynda tyrnaq izderi jáne basqa da zaqymdar bolǵan.
Polısıa qylmystyq is qozǵady. «Kýrsıvtiń» saýalyna oblystyq polısıa departamenti bul fakti boıynsha tergeý bastalǵanyn habarlady.
«Osy fakti boıynsha „Kámeletke tolmaǵandy tárbıeleý jónindegi mindetterdi oryndamaý“ baby boıynsha qylmystyq is qozǵaldy. Qazirgi ýaqytta tergeý sharalarynyń kesheni júrgizilýde. Osy quqyq buzýshylyqqa qatysy bar barlyq adamdar polısıa bólimine jetkizildi», — dep habarlady Atyraý oblysy polısıa departamentinde.
Polısıada tergeý múddesine baılanysty basqa aqparat ázirge jarıalanbaıtynyn qosty.
Buǵan deıin «Kýrsıv» Almatydaǵy «Atakent» saıabaǵynyń janynda belgisiz er adamnyń balanyń betine judyryqpen soqqanyn jazǵan bolatyn. Shabýyldaýshyny jaqyn jerde bolǵan Qorǵanys mınıstrliginiń Bitimgershilik operasıalar ortalyǵynyń ofıserleri ustap, polısıaǵa tapsyrǵan.