Atyraýda «Atyraý-Jaryq» JSHS elektr monteri elektr jelisinde jumys istep júrip tok soǵýynan qoly men aıaǵynan aıyryldy. Komısıa bastapqyda onyń kinásin 20 paıyz dep tanyǵanymen, er adam bul sheshimge daý aıtyp, jaýapkershilikten tolyq bosatylýyna qol jetkizdi, dep habarlaıdy infohub.kz saıty.
Oqıǵa 2025 jylǵy 19 jeltoqsanda bolǵan. Jumys bastalar aldynda dıspecherge brıgada jumys isteıtin ýchaskedegi elektr qýatyn óshirý tapsyrylǵan. Óshirilgeni rastalǵan soń, elektr monterleri jumysqa kirisken.
Elektr monteri elektr jelisiniń tireýinde turǵan kezde, dıspecher jeliniń jumysyn tekserýge sheshim qabyldap, kerneý bergen. Sot anyqtaǵandaı, qyzmetker bul ýchaskede jumys júrip jatqanyn bilgen, alaıda abaısyzdyq tanytyp, jelidegi brıgadany umytyp ketken.
Er adamǵa tok soqqan. Jaraqattar sonshalyqty aýyr bolǵany sonsha, onyń qoly men aıaǵy ampýtasıalanǵan.
Arnaıy tergeý nátıjesinde kiná eki tarapqa bólingen: 80 paıyzy jumys berýshige, al 20 paıyzy zardap shekkenniń ózine júktelgen. Elektr monteri bul qorytyndymen kelispeı, sotqa júgingen.
İsti qaraý barysynda jumys berýshi men jaýapty qyzmetkerlerdiń barlyq qajetti qaýipsizdik sharalaryn qamtamasyz etpegeni anyqtalǵan. Atap aıtqanda, adamdar jelide bolǵan kezde kerneý berýdi boldyrmaıtyn tıisti baqylaý bolmaǵan.
Elektr monteriniń ózi III toptaǵy ruqsatqa ıe bolǵan, brıgada quramynda jumys istep, jaýapty qyzmetkerdiń basshylyǵymen tapsyrmany oryndaǵan.
Sot komısıanyń oqıǵaǵa elektr monteriniń óreskel abaısyzdyǵy sebep boldy degen qorytyndysymen kelispegen.
«İs materıaldarymen talapkerdiń atalǵan talaptardy buzatyn jáne oqıǵanyń bolýyna áser etken qandaı da bir áreketter jasaǵany rastalmady», — dep habarlady Atyraý oblysynyń ÁMAK-nan.
Sot komısıa belgilegen 20 paıyz kinániń naqty mán-jaılarǵa jáne jumys berýshi tarapynan buzýshylyqtardyń dárejesine sáıkes kelmeıtinin anyqtaǵan.
Nátıjesinde arnaıy tergeý aktisiniń tarmaǵy zańsyz dep tanylǵan. Jumys berýshiniń kinási 100 paıyz, elektr monteriniki 0 paıyz dep belgilengen.
Atyraý oblystyq sotynyń ákimshilik ister jónindegi sot alqasy sheshimdi ózgerissiz qaldyrǵan. Ol zańdy kúshine engen.