Oqý jylynyń bastalýyna birneshe kún qaldy, al Atyraýdaǵy ata-analar balalarynyń qaıda oqıtynyn áli bilmeıdi. Olar óz aýdanyndaǵy mektep qurylysyn aıaqtaýdy talap etip otyr, dep habarlaıdy infohub.kz.
Kóktem shaǵyn aýdanynyń turǵyndary 600 oryndyq jańa ǵımaratty bes jyldan beri kútip keledi. Jergilikti turǵyn Ilás Kadırovtyń aıtýynsha, balalar úsh aýysymda oqýǵa májbúr, al ata-analar olardy qalypty mektepke aýystyrýǵa úmittenedi. «Eger mektep ashylmasa, ony týra aıtsyn — biz beker úmittenip júrmiz. Balalarymyz úsh aýysymda oqıdy. Biz olardy qalypty mektepke aýystyrǵymyz keledi. Eger bul mektep ashylmasa, keshiktirmeı-aq, balalarymyzdy birden osynda aýystyrǵymyz keledi», — dep suraq qoıady qala turǵyny.
Ata-analar bul máselemen ákimdikke birneshe ret júgingen, biraq jaýap almaǵan. Atyraý shetindegi mektepti ashý týraly ýádeler birinshi jyl emes. Buǵan deıin merdiger uıym kidiristi memlekettik búdjetten qarajattyń ýaqytyly túspeýimen túsindirse, keıin smetanyń ózgergenin aıtqan.
Al sheneýnikter qurylys aıaqtalǵanyn málimdep otyr. «Kóktem shaǵyn aýdanynda ornalasqan 600 oryndyq mekteptiń qurylysy tolyq aıaqtaldy. Barlyq rásimder júrgizildi, qazir nysandy 1 qyrkúıekte ashýǵa daıyndap jatyrmyz. Qurylys jumystary jobaǵa ózgerister engizýge baılanysty búginge deıin sozyldy», — dedi Atyraý oblysy qurylys basqarmasy bóliminiń bastyǵy Altynbek Qýanǵalı.