Atyraý oblysynda «Mereıli otbasy-2026» ulttyq baıqaýynyń aımaqtyq kezeńiniń qorytyndysy shyǵaryldy. Baıqaý otbasy ınstıtýtyn nyǵaıtýǵa jáne otbasylyq qundylyqtardy nasıhattaýǵa baǵyttalǵan. Marapattaý rásimine oblys ákimi Bolat Aqsholaqov qatysty, dep habarlaıdy infohub.kz saıty.
Memleket basshysynyń bastamasymen ótip kele jatqan baıqaý 2014 jyldan beri jyl saıyn ótkiziledi. Onyń basty maqsaty — ata-analardyń jas urpaq tárbıesindegi rólin arttyrý jáne dástúrli qundylyqtardy saqtaý.
Óńir basshysy qatysýshylardy jeńisterimen quttyqtap, irikteý kezeńine qatysqan barlyq otbasylarǵa alǵysyn bildirdi. «Bıyl bul baıqaý elimizde 13-shi ret ótip otyr. Bul otbasylyq qundylyqtardyń bizdiń qoǵam úshin qanshalyqty mańyzdy ekenin kórsetedi. Óıtkeni otbasy — árbir adam kúsh alatyn kıeli oshaq ári qoǵamnyń aınasy. Atyraý oblysy óz dástúrin saqtaıtyn eńbekqor, otanshyl otbasylarmen maqtanady. Sizder búgin alyp jatqan marapat — bul tek jeńistiń baǵasy ǵana emes, otbasylyq qundylyqtarǵa, ata-ana eńbegine jáne jas urpaq tárbıesine degen qurmet belgisi. Balalaryńyzdyń jetistikterine qýanyp, nemerelerińiz ben shóberelerińizdiń baqytyn kórýlerińizge tilektespin! Atyraý oblysynyń ár úıinde yrys, bereke jáne tatýlyq ornasyn», — dedi Bolat Aqsholaqov.
Bıyl oblystyq kezeńge barlyq aýdandar men Atyraý qalasynan 62 otbasy qatysty. Olardyń arasynda bilim, densaýlyq saqtaý, aýyl sharýashylyǵy, mádenıet, kásipkerlik jáne basqa salalardyń ókilderi bar. Kópbalaly jáne jas otbasylar erekshe belsendilik tanytty.
Fınaldyq kezeńge temirjolshylar, kásipkerler áýletteri, sondaı-aq dástúrleri urpaqtan urpaqqa jalǵasyp kele jatqan otbasylar qatarynda segiz otbasy ótti. Oblystyq komısıanyń sheshimimen birinshi oryndy Mahambet aýdanynan Zulqashevter otbasy, ekinshi oryndy Inder aýdanynan Sabyrovtar otbasy, úshinshi oryndy Isataı aýdanynan Bólekovter otbasy ıelendi. Jeńimpazdarǵa baǵaly syılyqtar tabystaldy.
Oblys atynan respýblıkalyq deńgeıde Jylyoı aýdanynan Ospanovtar otbasy synǵa túsedi. Bul — úlken ári tatý otbasy, onda jeti ul jáne bir qyz, 22 nemere jáne 37 shóbere tárbıelenýde. Otbasy músheleri bilim, quqyq qorǵaý, óndiris jáne mádenıet salalarynda eńbek etedi.
Sonymen qatar, oblystyq kezeńge qatysqan tórt otbasy alǵys hattarmen marapattaldy.
«Mereıli otbasy-2026» baıqaýynyń respýblıkalyq kezeńi Qazaqstanda qyrkúıek aıynyń ekinshi jeksenbisinde atap ótiletin Otbasy kúnine oraı ótedi.