Atyraýda munaı óńdeý zaýytynyń qasyndaǵy úılerde turatyn turǵyndardyń kópjyldyq máselesi aqyry sheshile bastady. Prokýratýra tekserisi AMÓZ-diń sanıtarlyq-qorǵanysh aımaǵy buzýshylyqpen anyqtalǵanyn jáne keıbir turǵyn úılerdi qamtymaǵanyn kórsetti. Endi onyń shekarasy keńeıtilip, ondaǵan otbasy qaýipsiz aýdandarǵa kóshe alady. Ákimdik zaýyt basshylyǵymen birlesip, kóshirý josparyn daıyndap jatyr, dep habarlaıdy infohub.kz saıty.
Atyraý munaı óńdeý zaýytynyń shekarasy qaıta qaralyp, mańaıdaǵy úılerdiń turǵyndary kóshiriledi. Buryn belgilengen sanıtarlyq-qorǵanysh aımaǵynyń kontýry qala turǵyndarynyń quqyǵyn buzǵan. Tekserýdi mamandandyrylǵan prokýratýra júrgizdi.
«Atap aıtqanda, buryn bekitilgen sanıtarlyq-qorǵanysh aımaǵynyń shekarasyna kásiporynǵa tikeleı irgeles jatqan turǵyn úıler engizilmegeni anyqtaldy. Osyǵan baılanysty prokýrorlyq qadaǵalaý aktisi engizilip, odan keıin sanıtarlyq-qorǵanysh aımaǵynyń jańa jobasy ázirlendi. Jańartylǵan shekaraǵa qosymsha turǵyn úı mekenjaılary engizildi. Qazirgi ýaqytta jergilikti atqarýshy organ zaýytpen birlesip is-sharalar josparyn ázirlep, ony iske asyrýǵa kiristi», — dedi prokýror Mıras Jalmurzın.
Jańa joba qabyldanǵannan keıin sanıtarlyq aımaqtyń aýdany 805 gektardan 840 gektarǵa deıin ulǵaıady, alaıda naqty shekaralar áli de túzetiletin bolady. Bul ózgeristerdi negizdeý úshin ekologtar bir jyl boıy úzdiksiz zertteýler júrgizdi.
«Osy jumys aıasynda bir jyl boıy tıisti zertteýler júrgizildi. Tórt maýsymdy qamtydyq: jaz, kóktem, kúz, qys. Onyń barysynda jel baǵytyn, lastaýshy zattardyń taralýyn jáne olardyń túrlerin eskere otyryp, barlyq baǵyt boıynsha anyqtaldy. Osy úlken jumystyń arqasynda sanıtarlyq-qorǵanysh aımaǵynyń shekarasy ázirlenip, anyqtaldy», — deıdi AMÓZ ókili Arman Dımýkashev.
Qorǵanysh beldeýiniń jańa shekarasyna turǵyn úı massıvi kiredi, odan 80-nen astam jeke úıdiń turǵyndaryn kóshirý josparlanýda. Qalalyq ákimdik memlekettik qajettilikter úshin ýchaskelerdi satyp alý qujattaryn daıyndap jatyr.
«Onyń quzyretine turǵyndardy habardar etý, túsindirý jumystaryn júrgizý, qajetti qujattardy rásimdeý jáne rásimdi tolyq súıemeldeý kiredi. Sodan keıin Qazaqstan Respýblıkasy Jer kodeksiniń talaptaryna sáıkes bekitilgen sanıtarlyq-qorǵanysh aımaǵy shegindegi barlyq nysandar memlekettik qajettilikter úshin alynady», — dedi ákimdiktiń resmı ókili Gasyrbek Tolegen.
Ǵımarattardyń naqty sany joba bekitilgennen keıin anyqtalady. Múlikti baǵalaýdy táýelsiz sarapshylar júrgizedi. Jaǵdaı oblys prokýrorynyń jeke baqylaýynda qalyp otyr.