Atyraý munaı óńdeý zaýyty (AMÓZ) tazartý qurylystaryndaǵy órtke qaramastan, shtattyq rejımde jumysyn jalǵastyrýda, dep habarlaıdy infohub.kz.
Oqıǵa 25 tamyzda saǵat 12:35-te boldy. Órt oshaǵy jabyq tıptegi mehanıkalyq tazartý qurylystarynyń (MTQ) tundyrǵyshynda ornalasqan — qondyrǵynyń ishinde munaı shlamy janyp jatyr.
AMÓZ baspasóz qyzmeti oqıǵa kezinde bul nysanda eshqandaı jumys júrgizilmegenin atap ótti. «Órtti oqshaýlaý jáne joıý jumystary jalǵasýda. Zardap shekkender joq. Zaýyt shtattyq rejımde jumysyn jalǵastyrýda», — delingen habarlamada.
Órt aýqymy men munaı shlamynyń tutaný sebepteri týraly aqparat naqtylanýda.
Keıinirek TJM órttiń zaýyt aýmaǵynda jedel joıylǵanyn habarlady. Strategıalyq nysannyń ereksheligine baılanysty qutqarýshylar oqıǵa ornyna joǵary dárejeli shaqyrtýmen shyqty.
Sóndirý hronologıasy men málimetteri: 12:55-te «112» púltine alǵashqy tútin týraly habarlama tústi. Zaýyt bazasynda birden jedel shtab quryldy. Órtpen shamamen 65 adam jáne 19 tehnıka (TJM kúshteri, «Semser órt sóndirýshi» JSHS, ATMA áýejaıynyń qutqarýshylary jáne NCOC) kúresti. 13:42-de órtti oqshaýlap, jalynnyń taralýyn toqtatý múmkin boldy.
Qazirgi ýaqytta órt tolyǵymen joıyldy, zardap shekkender joq. Mamandar oqıǵanyń sebepterin anyqtaýǵa kiristi, jaǵdaı tolyq baqylaýda.
Buǵan deıin «Kýrsıv» Atyraý munaı óńdeý zaýyty 2026 jylǵy naýryzda qańtardaǵy shyǵaryndylar úshin 520 mln teńge aıyppul tólegenin jazǵan bolatyn.