Atyraý oblysynyń Qurmanǵazy aýdanynda jańa mektep ǵımaraty dalada, Aqkól aýylynan 3 km-den astam jerde boı kóterdi. Ata-analar alańdaýly: balalar oqý ornyna óz betinshe bara almaıdy, dep habarlaıdy infohub.kz saıty.
Jergilikti turǵyndardyń aıtýynsha, aýyldan mektepke deıingi jol úsh shaqyrymnan asady. Ata-analar balalarynyń qaýipsizdigine alańdap, olardy jalǵyz jiberýge batyly barmaı otyr.
«Óte alys, qashyqtyq 3–4 km. Bala jaıaý júre almaıdy. Jaıaý júrse de, jol bir jarym saǵattan astam ýaqyt alady. Ol qaýipsiz asfált jolmen júrmeıdi!» — deıdi aýyl turǵyny Danagúl Serikqalıqyzy.
Aqkól turǵyndary mektepke aparatyn topyraq joldyń múlde jaryqtandyrylmaǵanyn atap ótti. Sondyqtan ata-analar balalardyń qaýipsizdigine alańdaýly.
«Tuman bolady, ártúrli jaǵdaı bolady. Balaǵa qaýip tónip tur. Jaryq joq, eshteńe jasalmaǵan. Bul bizdiń qateligimiz — barlyq jaǵdaı jasalmaıynsha, mekteptiń ashylýyna jol bermeý kerek edi. Balalar temirjol janyndaǵy eski mektepte oqýy tıis edi. Qazir balalarymyzǵa qaýip tónip tur dep esepteımiz», — deıdi jergilikti turǵyn Janseıit Ahatuly.
Turǵyndar aýdandyq bilim bólimine qys mezgilinde balalardy mektepke jáne keri qaıtarý úshin avtobýs bólýdi surap júgindi.
«Osy máselelerdiń barlyǵy, ata-analardyń balalardyń qashyqtyqqa baılanysty mektepke bara almaýy týraly shaǵymdary tıisti organdarǵa jetkizilip, joldanady. Qazir aýdandyq bilim bóliminiń bul máseleni óz kúshimen sheshýge múmkindigi joq. Sondyqtan biz oblystyq bilim basqarmasyna osy másele boıynsha usynys daıyndap jatyrmyz», — deıdi bilim bóliminiń basshysy Jiger Janqanov.