Atyraý oblysynyń prokýratýrasy búdjet qarajatyn jumsaý kezinde memlekettik qyzmettiń bedeline nuqsan keltiretin faktilerdiń jolyn kesti. Júzdegen mıllıon teńgege turǵyn úı satyp alý kezindegi alaıaqtyq úshin Qurmanǵazy aýdanynyń qurylys bóliminiń basshysy qyzmetinen aıyryldy, dep habarlaıdy infohub.kz saıty.
Qadaǵalaý organynyń málimetinshe, 2024 jyly jergilikti qurylys bólimi Qurmanǵazy aýylynda 600 mln teńgege 30 páter satyp alǵan. Alaıda keıin turǵyn úı gaz taratý jelilerine qosylmaǵany jáne jaıly turýǵa jaramsyz bolǵany anyqtaldy.
Tergeý barysynda bólim basshysy konkýrs ótkizilgenge deıin gazben jabdyqtaýdyń joqtyǵyn naqty bilgeni belgili boldy. Soǵan qaramastan ol tender uıymdastyryp, jekelegen kásipkerlerge aıqyn basymdyq berdi.
Sheneýniktiń isi etıka jónindegi keńestiń otyrysyna shyǵaryldy. Qaraý qorytyndysy boıynsha Qurmanǵazy aýdandyq qurylys bóliminiń basshysy memlekettik qyzmettiń bedeline nuqsan keltiretin teris qylyq jasaǵany úshin qyzmetinen bosatyldy.
Sonymen qatar prokýratýra Qyzylqoǵa aýdanynda da zańbuzýshylyqtardyń jolyn kesti. Munda jergilikti qurylys bóliminiń basshysy oryndalmaǵan jumystar úshin merdigerge 900 myń teńgeni zańsyz aýdaryp qoıǵan — oǵan qyzmettik sáıkestiginiń tolyq emestigi týraly eskertý jasaldy.
Vedomstvonyń habarlaýynsha, Atyraý oblysynda osyǵan uqsas qarjylyq buzýshylyqtar úshin taǵy úsh laýazymdy tulǵa jaýapkershilikke tartyldy.