Atyraý oblysynda 2026-2027 oqý jylynyń basynda jeti jańa mektep esigin aıqaqty. Oqýshylar oblys ortalyǵynda, sondaı-aq Qurmanǵazy jáne Jylyoı aýdandarynda ornalasqan zamanaýı bilim oshaqtarynda sabaqtaryn bastady, dep habarlaıdy infohub.kz saıty.
Atyraý oblysy ákimdiginiń málimetinshe, 1 qyrkúıekte Damba aýylyndaǵy 300 oryndyq jańa mektepte, sondaı-aq Kóktem jáne Erkinqala-2 aýyldaryndaǵy árqaısysy 600 oryndyq eki mektepte alǵashqy qońyraý soǵyldy.
«Keleshek mektepteri» ulttyq jobasy aıasynda Qurmanǵazy aýdanynyń Qurmanǵazy jáne Aqkól aýyldarynda 600 oryndyq eki mektep, al Jylyoı aýdanynyń Qulsary qalasynda 1200 oryndyq mektep paıdalanýǵa berildi.
Atyraý qalasynda 2 myń oqýshyǵa arnalǵan Caspian BINOM School alǵashqy shákirtterin qabyldady. Jańa mektepter zamanaýı oqý kabınetterimen, zerthanalarmen, kitaphanalarmen, sport jáne akt zaldarymen, asqanalarmen jabdyqtalǵan. «Keleshek mektepterinde» STEM, robototehnıka jáne IT kabınetteri, sondaı-aq shyǵarmashylyq sheberhanalar qarastyrylǵan.
Shoqan Ýálıhanov atyndaǵy №9 jalpy bilim beretin mektep kúrdeli jóndeýden keıin ashyldy. 1176 oqýshyǵa arnalǵan ǵımaratta oqý kabınetteri tolyǵymen jańartylyp, qajetti zamanaýı qural-jabdyqtar ornatyldy.
Bıyl Atyraý oblysynda 155 myńnan astam oqýshy jańa oqý jylyn bastady. Onyń shamamen 15 myńy mektep tabaldyryǵyn alǵash ret attady.
Óńirde bilim ınfraqurylymyn damytý jumystary jalǵasýda. Jyl sońyna deıin taǵy eki bilim nysanyn jáne bir óner mektebin paıdalanýǵa berý josparlanýda. Qazirgi ýaqytta oblysta 14 mekteptiń qurylysy júrip jatyr.