Atyraý turǵyny dastarqan basynda júrekten pyshaq suqqan tanysyn keshirdi. Janjal metal qurylymdar jasaıtyn sehta bolǵan. Bul týraly infohub.kz habarlady.
Sot anyqtaǵandaı, dastarqan basynan shamamen bir saǵat ótken soń janjal shyqqan. Aıyptalýshynyń aıtýynsha, tóbeleste qarsylasynan kúshi kem bolǵandyqtan, ol as úı pyshaǵyn alyp, bir soqqy jasaǵan.
Sot-medısınalyq saraptama boıynsha, jábirlenýshi keýde qýysynan ótpeli pyshaq jaraqatyn alǵan. Nátıjesinde júrek qabyǵy men júrektiń oń qarynshasy zaqymdanyp, bul ekinshi dárejeli gemorragıalyq shokqa ákelgen. Jaraqat densaýlyqqa aýyr zıan retinde saralanǵan.
Sotta jábirlenýshi mas bolǵanyn, janjaldy ózi týdyrǵanyn jáne soqqy sátin baıqamaǵanyn moıyndady. Ol shabýyl jasaǵan adam jedel járdem shaqyryp, kómektesýge tyrysqanyn aıta kele, ony keshirgenin, eshqandaı talaby joq ekenin jáne bas bostandyǵynan aıyrmaýdy ótingenin jetkizdi. Aıyptalýshy kinásin tolyq moıyndap, ókinish bildirdi.
Sot er adamdy densaýlyqqa qasaqana aýyr zıan keltirdi dep taýyp, úsh jylǵa bas bostandyǵynan aıyrý jazasyn kesti. Alaıda kináni moıyndaý, ókiný, buryn sottalmaǵany, jábirlenýshige kómek kórsetý jáne onyń aıyptalýshyny kolonıaǵa jibermeý týraly ótinishin eskerip, jaza shartty túrde taǵaıyndaldy.