Atyraýdaǵy «Bekbolatovtar Qurylys Kompanıasy» 2025 jyldyń qorytyndysy boıynsha 285,3 mln teńge paıda tapty. Bir jyl buryn bul kórsetkish 2,3 mlrd teńgege jetken, ıaǵnı paıda 8,1 esege qysqarǵan. Bul týraly infohub.kz saıty habarlaıdy.
Sonymen qatar kásiporynnyń 2025 jylǵy túsimi 8,2 mlrd teńge boldy, 2024 jyly bul kórsetkish 4,98 mln teńge edi — 1,6 esege ósken. 2025 jyldyń sońynda bólinbegen paıda 7,7 mlrd teńge deńgeıinde tirkeldi.
Kompanıa Atyraýda tirkelgen jáne qurylys-montaj jumystaryna lısenzıasy bar. Eseptilikke sáıkes, túsimniń negizgi bóligin Atyraý men Atyraý oblysyndaǵy sýmen jabdyqtaý nysandaryn, mektepterdi, balabaqshalardy, emhanalar men mamandandyrylǵan medısınalyq mekemelerdi, sondaı-aq ınjenerlik-kommýnıkasıalyq ınfraqurylym men óndiristik nysandardy salý jáne kúrdeli jóndeýden ótkizý esebinen alǵan.
Atap aıtqanda, BAQ «Bekbolatovtar Qurylys Kompanıasy» Atyraýdaǵy Nursaıa shaǵyn aýdanynda 6,39 mlrd teńgege emhana, Orken shaǵyn aýdanynda 6,33 mlrd teńgege emhana salǵanyn habarlaǵan. Eki nysannyń bastapqy quny shamamen 6,7 mlrd teńge bolǵan, alaıda jobalardy iske asyrý barysynda ol eki esege jýyq ósip — 12,7 mlrd teńgege jetken. Atyraý oblysynyń qurylys, sáýlet jáne qala qurylysy basqarmasy qymbattaýdy jer asty sýlarynyń deńgeıiniń kóterilýimen jáne qosymsha tehnıkalyq sheshimder men jabdyqtar qajettiligimen túsindirgen.
Budan bólek, kompanıa Atyraý qalalyq turǵyn úı-kommýnaldyq sharýashylyq jáne turǵyn úı ınspeksıasy bóliminiń qatty turmystyq qaldyqtar polıgonyn rekýltıvasıalaýǵa 11 mlrd teńgege tapsyrysyn alǵan. Oǵan sondaı-aq Atyraýdaǵy sýmen jabdyqtaý nysandaryn kúrdeli jóndeýge kelisimshart buıyrǵan: jumystyń ekinshi kezeńi 1,78 mlrd teńgege, úshinshisi taǵy 2 mlrd teńgege baǵalanǵan.
«Bekbolatovtar Qurylys Kompanıasynyń» jalǵyz ıesi — kásipker Aıbek Tlemısov. Ashyq derekkózderde ol týraly málimet joq.