25 shildede Aqtóbe men Qostanaıda, al túnde Atyraýda qolaısyz meteorologıalyq jaǵdaılar kútiledi, dep habarlaıdy infohub.kz.
Qolaısyz meteojaǵdaılar (QMJ) tymyq aýa raıy, álsiz jel, tuman jáne temperatýralyq ınversıa kezinde paıda bolady. Mundaı jaǵdaıda zıandy zattar atmosferanyń jerge jaqyn qabatynda jınalady, sonyń saldarynan aýa sapasy nasharlaıdy.
Sınoptıkterdiń eskertýinshe, QMJ kezeńinde lastanǵan aýanyń densaýlyqqa keri áser etý qaýpi artady, ásirese sozylmaly aýrýlary bar adamdar úshin.
Aýanyń lastaný deńgeıine jeldiń jyldamdyǵy, jaýyn-shashyn, ylǵaldylyq jáne temperatýra da áser etedi.
QMJ kútiletin qalalardyń turǵyndaryna kóshede, ásirese kólik qozǵalysy kóp joldar men basqa lastaný kózderiniń janynda ýaqyt ótkizýdi azaıtýǵa keńes beriledi. Balalar, qart adamdar jáne júkti áıelderge uzaq serýendeýden bas tartý usynylady.
Tynys alý organdary, júrek-qan tamyrlary júıesi aýrýlary bar adamdar men alergıalyq aýrýlarǵa qajetti dári-dármekterin árqashan ózderimen birge alyp júrýge keńes beriledi. Ashyq aýadaǵy dene jattyǵýlaryn shektegen nemese jabyq úı-jaıǵa aýystyrǵan durys.
Buǵan deıin «Qazgıdromette» 25 shildege Qazaqstannyń 17 aımaǵynda 43 gradýsqa deıingi kúshti jáne anomaldy ystyq, naızaǵaı, burshaq, ekpindi jel, shańdy daýyldar jáne tótenshe órt qaýpine baılanysty daýyldy eskertý jarıalanǵany habarlandy.