Sınoptıkter Qazaqstandaǵy kúz aılaryna konsýltatıvtik aýa raıy boljamyn usyndy. «Qazgıdromet» RMK derekterine sáıkes, maýsymnyń eki aıynda aýa temperatýrasy klımattyq normadan joǵary bolady dep kútilýde, dep habarlaıdy infohub.kz saıty.
Qyrkúıekte respýblıkanyń basym bóliginde ortasha aılyq aýa temperatýrasy norma shamasynda bolady. Alaıda Batys Qazaqstan oblysynyń basym bóliginde, sondaı-aq Atyraý jáne Mańǵystaý oblystarynyń batysynda termometr baǵandary ádettegi mánnen bir gradýsqa joǵary kóterilýi múmkin.
Jaýyn-shashynǵa keler bolsaq, onyń artyq mólsheri Soltústik Qazaqstan, Pavlodar, Batys Qazaqstan oblystarynyń basym bóliginde jáne Aqmola oblysynda, Atyraý oblysynyń soltústik-batysynda, Qostanaı oblysynyń soltústik-shyǵysynda, Qaraǵandy oblysynyń tótenshe soltústiginde, Shyǵys Qazaqstan oblysynyń soltústik jartysynda jáne Abaı oblysynda kútiledi.
Qazanda aýa temperatýrasy eldiń basym bóliginde normadan 1–2 gradýsqa joǵary bolady. Almaty oblysynda, Jetisý oblysynda, Shyǵys Qazaqstan oblysynda, Túrkistan jáne Jambyl oblystarynyń ońtústik-shyǵysynda, sondaı-aq Abaı oblysynyń ońtústik-shyǵys jartysynda temperatýra ádettegi mánge jaqyn bolady.
Qazandaǵy jaýyn-shashyn mólsheri respýblıkanyń búkil aýmaǵynda norma shamasynda bolady dep kútilýde.
Qarashada ortasha aýa temperatýrasy da Qazaqstannyń basym bóliginde normadan 1–2 gradýsqa joǵary bolady. Almaty oblysy, Jetisý jáne Abaı oblystary, Shyǵys Qazaqstan oblysy, sondaı-aq Jambyl, Qaraǵandy jáne Pavlodar oblystarynyń shyǵys jartysynda termometr kórsetkishteri ádettegi mánge jaqyn bolady.
Qarashada jaýyn-shashyn el aýmaǵynyń basym bóliginde norma shamasynda bolady. Degenmen Soltústik Qazaqstan oblysynda, Qostanaı, Aqmola jáne Pavlodar oblystarynyń soltústik jartysynda onyń mólsheri ádettegi mánnen asýy múmkin.