Sınoptıkter 5-7 qyrkúıektegi demalys kúnderine Qazaqstan boıynsha aýa raıy boljamyn usyndy. Elde qurǵaq ári jyly aýa raıy kútilýde, dep habarlaıdy infohub.kz saıty.
«Qazgıdromet» RMK mamandarynyń málimetinshe, aldaǵy úsh táýlikte respýblıka aýmaǵynyń basym bóligi atmosferalyq qysym joǵary aımaqtyń yqpalynda bolady, bul negizinen qurǵaq ári bulttylyǵy az aýa raıyn qamtamasyz etedi. Eldiń batysynda, ońtústiginde jáne ońtústik-shyǵysynda atmosferalyq fronttardyń áserinen keı jerlerde naızaǵaı men jelmen birge qysqa merzimdi jańbyr jaýady.
Jazǵydaı jyly kúnder eldiń barlyq derlik turǵyndaryn qýantady, alaıda shyǵysta jáne ońtústik-shyǵystyń taýly aýdandarynda túnder salqyn bolyp qalady. Kúndiz aýa temperatýrasy batysta, soltústikte jáne el ortalyǵynda +25...+33 gradýsqa, shyǵysta +20...+25 gradýsqa jetedi. Ońtústikte termometrler +28...+37 gradýsty kórsetedi, al ońtústik-shyǵysta +20...+30 gradýs. Taýly jáne taý bókterindegi aýdandarda temperatýra +10...+20 gradýsqa deıin kóteriledi.