Aldaǵy kúnderi Qazaqstannyń basym bóliginde jańbyr men naızaǵaı oınap, keı jerlerde burshaq jaýýy múmkin. Sonymen qatar, keıbir óńirlerde aptap ystyq saqtalady, dep habarlaıdy infohub.kz.
«Qazgıdromet» RMK sınoptıkteri 20-22 tamyz aralyǵyna arnalǵan aýa raıy boljamyn usyndy. Meteorologtardyń málimetinshe, atmosferalyq fronttardyń ótýine baılanysty respýblıkanyń basym bóliginde jańbyr men naızaǵaı kútiledi, jel kúsheıedi, sondaı-aq burshaq jaýýy yqtımal. Eldiń soltústik jartysynda túnde jáne tańerteń tuman túsedi.
Qatty jaýyn-shashyn 20 tamyzda Qazaqstannyń ortalyǵynda, 21 tamyzda shyǵysynda, al 22 tamyzda soltústik-batysynda jáne eldiń ońtústik-shyǵysyndaǵy taýly aýdandarda kútiledi.
Batys óńirlerde jáne respýblıkanyń ońtústik-shyǵysynda aptap ystyq saqtalady: kúndiz termometr baǵandary +30...+38 gradýsqa jetedi, al Mańǵystaý oblysynyń keıbir aýdandarynda +41 gradýsqa deıin kóteriledi.
Qalǵan aýmaqtarda temperatýralyq fonda aıtarlyqtaı ózgeris kútilmeıdi. Qostanaı oblysynda temperatýra +20...+30 gradýs, soltústik oblystarda +17...+28 gradýs, ortalyq jáne shyǵys óńirlerde +17...+30 gradýs bolady. Qazaqstannyń ońtústiginde kúndizgi temperatýra +30...+38 gradýs aralyǵynda bolady.