Áýejaıda nemese ushaq bortynda abaısyzda aıtylǵan bir aýyz sóz qazaqstandyqtarǵa 21 mln teńge aıyppul nemese bes jyl bas bostandyǵynan aıyrý jazasyn ákelýi múmkin. Tyıym salynǵan sózder týraly Qazaqstan Respýblıkasy Azamattyq avıasıa komıteti eskertti, dep habarlaıdy infohub.kz saıty.
Vedomstvo «bomba», «jarylys», «terrorıst», «qarý», «basyp alý» degen sózder qaýipsizdikke qater tóndirýi múmkin ekenin atap ótti. Yqtımal qaýip týraly kez kelgen aqparat baıypty qabyldanady, al ekıpaj ben avıasıalyq qaýipsizdik qyzmetteri belgilengen tártip boıynsha áreket etýge mindetti.
«Bul shamadan tys reaksıa bolyp kórinýi múmkin, biraq avıasıa úshin olaı emes. Ekıpaj bul ázil, aýyzdan shyǵyp ketken sóz nemese naqty qaýip týraly aqparat pa — qulaqpen anyqtaı almaıdy», — dedi Azamattyq avıasıa komıtetinde.
Kez kelgen abaısyz sózden keıin avıasıalyq qaýipsizdik sharalarynyń tutas kesheni iske qosylady: ushaq pen bagajdy tekserý, arnaıy qyzmetterdi shaqyrý, jolaýshylardy evakýasıalaý nemese áýejaıǵa kirýdi shekteý.
Nátıjesinde kezdeısoq ázil áýe kemesin aýystyrýǵa, reıstiń keıinge shegerilýine jáne áýejaı men avıakompanıa úshin qosymsha shyǵyndarǵa ákelýi múmkin.
Qazaqstan Respýblıkasy Qylmystyq kodeksiniń 273-babyna sáıkes, terorızm aktisi týraly kórineý jalǵan habarlama jasaý 5 myń aılyq eseptik kórsetkishke deıingi mólsherde (21,6 mln teńge) aıyppul salýǵa, túzeý jumystaryna, bas bostandyǵyn shekteýge nemese bes jylǵa deıingi merzimge bas bostandyǵynan aıyrýǵa jazalanady.
Buǵan deıin «Kýrsıv» halyqaralyq áýejaılardyń ushý bıletterinde qazaqstandyqtarǵa ushaq bortynda bomba týraly ázil úshin qylmystyq jaýapkershilik týraly eske salatyn jadnamalar ornalastyryla bastaǵanyn jazǵan bolatyn.