Aýstrıada jańa oqý jylynyń bastalýymen 14 jasqa tolmaǵan qyzdardyń mektepterde dástúrli musylmandyq bas kıimderin kıýine tyıym salatyn zań kúshine endi. Bul shekteý memlekettik jáne jeke menshik oqý oryndaryna qoldanylady. Bılik bul sheshimdi «qyzdardyń quqyqtaryn qorǵaý» jáne «genderlik teńdikti qamtamasyz etý» nıetimen túsindirip otyr, dep habarlaıdy infohub.kz saıty.
Integrasıa jónindegi mınıstr Klaýdıa Baýer: «Bas oramal — qyzdardy erte jastan baqylaýǵa alýdyń belgisi jáne olardy basyp-janshýdyń quraly», — dedi.
Muǵalimder jańa erejelerdiń saqtalýyn qadaǵalaýy tıis: aldymen oqýshylarmen jáne olardyń zańdy ókilderimen áńgimelesý, al qaıtalanǵan buzýshylyqtar kezinde balalardy qorǵaý qyzmetterine habarlaý. Tótenshe shara retinde ata-analarǵa nemese qamqorshylarǵa 800 eýroǵa (shamamen 423 myń teńge) deıin aıyppul salynýy múmkin.
Aıta keteıik, 2020 jyly Aýstrıanyń Konstıtýsıalyq soty bastaýysh mektepterde oramal kıýge uqsas tyıymdy dinı beıtaraptyq qaǵıdatyna qaıshy keledi dep tanyp, ony joıǵan bolatyn.