Qazaqstanda aýyr júk kólikteri avtomattandyrylǵan salmaq baqylaý beketterin aınalyp ótýde, bul «QazAvtoJol» ulttyq kompanıasynyń nazaryn aýdardy. Áleýmettik jelilerde respýblıkalyq mańyzy bar trassalardyń birinde júk kólikteriniń ólsheý júıesin aınalyp ótkeni kórsetilgen vıdeo tarady, dep habarlaıdy infohub.kz saıty.
«QazAvtoJol» UK» AQ ahýalǵa túsinikteme berip, kadrlardaǵy QAJ logotıpi bar júk kóligi kompanıaǵa tıesili emes, onyń balansynda turmaıtynyn jáne onymen sharttyq qatynasta joqtyǵyn atap ótti.
Kompanıa ókilderi Saryózek – Kóktal jolynyń 7,5 shaqyrymynda ornalasqan avtomattandyrylǵan ólsheý beketiniń (AÓB) jumysqa jaramdy ekenin jáne qalypty rejımde jumys istep turǵanyn túsindirdi. Alaıda jarıalanǵan kadrlarda keıbir júk kólikteriniń qasyndaǵy tehnıkalyq ótpe joldy paıdalanyp, salmaq pen kólemdi baqylaý júıesin aınalyp ótip jatqany kórinedi.
«QazAvtoJolda» bul tehnıkalyq ótpe joldyń respýblıkalyq mańyzy bar jolǵa qatysy joq, kompanıanyń balansynda joq jáne ol tarapynan salynbaǵanyn atap ótti. Ony jabdyqtaý men paıdalanýdyń quqyqtyq negizderine qatysty máseleler kompanıanyń quzyretinen tys jáne ýákiletti organdardyń baǵasyn talap etedi.
Sondaı-aq, buǵan deıin kompanıa AÓB aınalyp ótýdiń yqtımal joldaryna birneshe ret fızıkalyq qorshaýlar ornatqany, alaıda olardy bógde adamdar óz betinshe buzyp tastaǵany aıtyldy. Aınalyp ótýdiń kezekti faktileri tirkelgennen keıin qosymsha sharalar qabyldandy: búgin arnaıy tehnıkany tarta otyryp, aýyr júk kólikteriniń bul jolmen ótý múmkindigi fızıkalyq turǵyda joıyldy.
Kompanıada AÓB tasymaldaýshylarǵa kedergi jasaý úshin emes, salmaq pen kólem parametrleriniń saqtalýyn qamtamasyz etý jáne avtomobıl joldaryn saqtaý úshin ornatylatynyn eske saldy. Artyq júkteme koleılik pen deformasıalardyń paıda bolýyn tezdetedi, jol tóseminiń qyzmet etý merzimin qysqartady jáne ony qalpyna keltirýge qosymsha shyǵyndar ákeledi.
«QazAvtoJolda» qajetti ınjenerlik-tehnıkalyq sharalardy qabyldaýdy jalǵastyratynyn, al AÓB-ny ádeıi aınalyp ótý, qorshaýlardy óz betinshe buzý jáne salmaq baqylaýynan jaltarý úshin bógde ótpe joldardy paıdalaný faktilerine quzyretti memlekettik organdar tarapynan baǵa berilýi tıis ekenin qosa aıtty.
Buǵan deıin kompanıa artyq júktelgen júk kólikteri Qazaqstandaǵy asfálttyń basty «jaýlarynyń» biri ekenin habarlaǵan bolatyn.