Almaty oblysy Túrgen aýylynda birneshe apta buryn qatty jańbyrdan keıin ózenniń arnasynan asyp ketýi saldarynan qıraǵan avarıalyq kópirdi qalpyna keltirý jumystary bastaldy. Qurylys jumystaryn úsh aı ishinde aıaqtaý josparlanýda, dep habarlaıdy infohub.kz.
Anyqtalǵandaı, kópir 2024 jyly-aq avarıalyq dep tanylǵan. Búgin Almaty oblysynyń ákimi Marat Sultanǵazıev nysandy arnaıy aralap, qurylys barysymen tanysty. Qazirgi ýaqytta nysanda tórt birlik tehnıka jumyldyrylǵan, jumystardy onnan astam maman atqarýda. Kópir qurylysy bir apta buryn bastalǵan, buzý jumystary tolyq aıaqtaldy, burǵylaý jumystaryna daıyndyq júrgizilýde. Merdigerdiń aıtýynsha, nysandy qarasha aıynda tolyq paıdalanýǵa berý josparlanýda.
«Bul kópir turǵyndar úshin de, týrıser úshin de mańyzdy. Sondyqtan jumys sapasy men qurylys merzimin saqtaýǵa erekshe kóńil bólý qajet. Jobany iske asyrýdyń árbir kezeńinde barlyq tehnıkalyq talaptar qatań oryndalýy tıis», — dep atap ótti óńir basshysy.
Buǵan deıin sel saldarynan Túrgen ózeni Almaty oblysy Eńbekshiqazaq aýdanyndaǵy Assy ústirtine deıingi joldy shaıyp ketkeni habarlanǵan bolatyn. Qutqarýshylar Túrgen shatqalynan 42 adamdy, onyń ishinde úsh balany evakýasıalady.