Almaty oblysynyń İle aýdanynda «Baıserke aspany – 2026» avıafestıvali ashyldy. Qonaqtardy aerodrom ústindegi ushýlar, áýe kemeleriniń kórmesi jáne ushqyshtarmen kezdesýler kútip tur, dep habarlaıdy infohub.kz saıty.
Sondaı-aq is-shara óńirdegi shaǵyn avıasıany damytýdy talqylaý alańyna aınaldy. Festıvál aıasynda ótken baspasóz máslıhatynda sarapshylar jastardy tehnıkalyq mamandyqtarǵa tartý, avıasıalyq mádenıetti qalyptastyrý jáne Almaty oblysynyń týrısik áleýetin arttyrý máselelerin qozǵady.
Kezdesýge «Báıterek» AQ basqarma tóraǵasy, ushqysh-ǵaryshker Aıdyn Aıymbetov, «Otan» aeroklýbynyń jetekshisi Iýrı Elsov, «Tán-Shan» avıasıalyq ortalyǵynyń bas dırektory Vladımır Ansýpov jáne Qazaqstandyq shaǵyn avıasıa qaýymdastyǵynyń prezıdenti Ómirbek Kenesbaev qatysty.
Spıkerler avıasıa tek kásibı salamen shektelmeýi kerek, al balalardyń ushqysh, ınjener jáne tehnık sıaqty mamandyqtarǵa qyzyǵýshylyǵyn arttyrý mańyzdy ekenin atap ótti. «Áýe tehnıkasyn óz kózimen kórip, mamandarmen sóılesken jastar bolashaq kásibı baǵytyn anyqtaı alady», – dep sanaıdy olar.
Baspasóz máslıhatynan keıin festıváldiń negizgi baǵdarlamasy bastaldy. Qonaqtar ushaqtardyń áserli ushýlaryn, ashyq aspan astyndaǵy tehnıka kórmesin tamashalap, avıasıalyq mamandyqtardyń erekshelikteri týraly mamandarmen jeke sóılese aldy.
Uıymdastyrýshylar avıasıa men týrızmdi biriktirý óńirge degen qyzyǵýshylyqty arttyrýy múmkin ekenin atap ótti. «Osy turǵyda festıvál tek áýe tehnıkasynyń kórmesi retinde ǵana emes, óńirdiń týrısik kórikti jerlerin jańa qyrynan tanystyrý alańy retinde de qarastyrylady», – delingen habarlamada.