Grýzıadaǵy Batým munaı termınaly segiz jyldyq úzilisten keıin Qazaqstanǵa avıasıalyq kerosın tıep-túsirýdi qaıta bastady, — dep habarlaıdy infohub.kz saıty.
«QazTransOıl» AQ-nyń sheteldik aktıvi sanalatyn bul termınal Qazaqstanǵa jóneltý úshin avıaotyndy qaıta qabyldaı bastady. Shilde aıynda JET A1 markaly 10 myń tonna kólemindegi avıasıalyq kerosınniń alǵashqy partıasy tıeldi. Eýropada óndirilgen otyn Qara teńiz arqyly teńiz jolymen jetkizilip, qazir Qazaqstanǵa tasymaldaý úshin temirjol sısternalaryn kútýde.
Kompanıada tıep-túsirýdiń qaıta jandanýy Transkaspı halyqaralyq kólik baǵyty (Orta dáliz) boıynsha elge avıaotyn jetkizýge múmkindik beretinin atap ótti. «JET A1 avıasıalyq kerosıni — azamattyq avıasıanyń negizgi otyn túri. Ol áýe kemeleriniń senimdi paıdalanylýyn jáne avıatasymaldardyń úzdiksiz oryndalýyn qamtamasyz etedi», — dep málimdedi «QazTransOıl» AQ.
Kompanıada avıaotynnyń turaqty jetkizilýi Qazaqstannyń kólik salasyn damytý, utqyrlyqty arttyrý jáne eldiń energetıkalyq qaýipsizdigin nyǵaıtý úshin mańyzdy ekenin atap ótti. Batým munaı termınaly munaı men munaı ónimderin tıep-túsirýge mamandanǵan. Ol arqyly avıasıalyq kerosınnen basqa, shıki munaı, mazýt, dızel otyny, avtomobıl benzıni, suıytylǵan kómirsýtek gazdary jáne basqa da munaıly júkter ótedi. 2026 jyldyń birinshi jartyjyldyǵynda tıep-túsirý kólemi shamamen 725 myń tonnany qurady.