Qazaqstannyń 30-dan astam turǵyny avtokólikterin avtosalon arqyly satpaq bolyp, alaıaqtyqtyń qurbany boldy. Kólik ıeleri naryqtyq baǵamen tez satylady degen ýádege senip, kólikterin kompanıaǵa tapsyrǵan. Alaıda aqsha da, kólik te almaǵan. Kompanıa qyzmetkerleri baılanysqa shyqpaı ketken. Bul týraly infohub.kz saıty habarlaıdy.
Zardap shekkenderdiń aıtýynsha, olar kólikti qysqa merzimde baǵasyn tómendetpeı satamyz degen kompanıaǵa júgingen. 30-dan astam adam kólikterin avtosalonǵa qaldyrǵan. Biraq biraz ýaqyt ótken soń keńsege kelgende, qyzmetkerler de, kólikter de joq bolyp shyqqan.
Kóliginen aıyrylǵandardyń biri Asqat Qaraqul bylaı dedi: «Men bul kompanıany áleýmettik jeliden taptym. Kólikti 12,2 mıllıon teńgege satyp, úsh-tórt kún ishinde aqshasyn aýdaramyz dep ýáde berdi. Keıin kelisimshartta 14 kún dep jazylǵan dep sózben ǵana aıtyp, ýádelermen toqtatty. Bul birneshe aı buryn bolǵan!»
Zardap shekkenderdiń aıtýynsha, kólikterdi tapsyrǵannan keıin kelesi kúni-aq olardy fırma dırektorynyń atyna qaıta tirkegen. Keıbir kólikter birneshe ret satylǵan nemese lombardqa qoıylǵan. Keıbiri áli de avtosalonda tur, biraq ıeleri olarǵa qol jetkize almaı otyr. Kólik ıeleri zardap shekkenderdiń sany odan da kóp bolýy múmkin dep esepteıdi.
Zardap shekkender zalaldy óteýdi surap, quqyq qorǵaý organdaryna júgingen. Polısıa kúdiktilerdiń ustalǵanyn habarlady. Almaty oblysy Polısıa departamentiniń ókili Ernar Saıdıldın bylaı dedi: «Bul faktige qatysty polısıa qyzmetkerleri asa iri mólsherde jasalǵan alaıaqtyq belgileri boıynsha sotqa deıingi tergeý júrgizýde. Qazirgi ýaqytta qajetti tergeý áreketteriniń kesheni júrgizilýde. Tergeýdiń tolyqtyǵy, jan-jaqtylyǵy jáne obektıvtiligin qamtamasyz etý úshin arnaıy tergeý-jedel toby quryldy. Tergeý barysy Almaty oblysy Polısıa departamenti basshylyǵynyń erekshe baqylaýynda».