Qazaqstanda qıyn ómirlik jaǵdaıǵa tap bolǵan áıel-kýrerlerge ataýly áleýmettik qoldaý kórsetý boıynsha pılottyq joba iske qosylady. Olar zańgerlik jáne gýmanıtarlyq kómekke sene alady, dep habarlaıdy infohub.kz saıty.
Eńbek jáne halyqty áleýmettik qorǵaý mınıstrligi, Yandex Qazaqstan kompanıasy jáne «İsker» qoldaý ortalyǵy» qoǵamdyq qory bastamany iske qosý týraly memorandýmǵa qol qoıdy. Kómek Yandex Go qosymshasyndaǵy «Eda», Lavka jáne «Dostavka» servısteri arqyly tapsyrystardy oryndaıtyn jáne qıyn nemese daǵdarystyq jaǵdaıǵa tap bolǵan áıelderge arnalǵan.
Jobaǵa Yandex servısteri arqyly keminde tórt apta qatarynan kýrer bolyp jumys isteıtin jáne baǵdarlama talaptaryna sáıkes keletinder qatysa alady. Ótinimderdi qaraý kezinde áleýmettik osal sanattarǵa basymdyq beriledi: jalǵyzbasty analar, kópbalaly analar, múgedektigi bar áıelder, erekshe qajettilikteri bar balalardy tárbıelep otyrǵan áıelder, sondaı-aq aýyr naýqas otbasy múshelerine kútim jasaıtyndar. Degenmen, bul sanattarǵa jatatyndyq kómekti avtomatty túrde alýǵa kepildik bermeıdi — sheshim naqty jaǵdaı men otbasynyń qajettilikterin eskere otyryp, jeke qabyldanady.
Joba aıasynda áıelderge áleýmettik qyzmetter men memlekettik qoldaý sharalaryn alýǵa kómektesedi. Sondaı-aq zańgerlik jáne psıhologıalyq kómek, gýmanıtarlyq kómek, quqyqtyq jáne qarjylyq saýattylyqty arttyrý, bilim berý jáne aqparattyq baǵdarlamalarǵa qol jetkizý, negizder bolǵan kezde medısınalyq kómek alýǵa járdemdesý qarastyrylǵan. Kómektiń túri men kólemi jeke anyqtalady.
Qatysý sharttary men ótinim berý tártibi týraly aqparat «Iandeks Pro» qosymshasyndaǵy «Negizgi yntymaqtastyq týraly» bóliminde, «Áıel-kýrerlerge kómek» maqalasynda qoljetimdi. Sondaı-aq tıisti servıstiń qoldaý qyzmetine habarlasýǵa bolady.
Jobany iske qosý týraly qujatqa eńbek jáne halyqty áleýmettik qorǵaý mınıstri Asqarbek Ertaev, Yandex Qazaqstan kompanıalar tobynyń jetekshisi Tımýr Shálekenov jáne «İsker» qoldaý ortalyǵy» qorynyń dırektory Tolqyn Sámetova qol qoıdy. Joba pılottyq rejımde iske qosyldy, onyń qorytyndysy boıynsha taraptar mundaı qoldaýdyń suranysqa ıeligin jáne baǵdarlamany odan ári damytý múmkindigin baǵalaıdy.
Buǵan deıin Qazaqstanda taksı júrgizýshileri men kýrerlerge klıenttermen kásibı qarym-qatynas jasaý boıynsha tegin onlaın-kýrs iske qosylǵany habarlanǵan bolatyn.