Áıelder tenıs qaýymdastyǵy (ÁTQ) áıelder jarysyna qatysýshy tenısshilerdiń bir rettik genetıkalyq testten ótýin mindettedi, dep habarlaıdy infohub.kz saıty.
ÁTQ-nyń jeksenbi kúni jarıalaǵan jańa erejesine sáıkes, jynysty anyqtaıtyn genge testileý jaq ishinen jaǵyndy nemese qan analızi arqyly júrgiziledi. Bul ereje seısenbiden bastap kúshine enedi. Buǵan deıin qoldanylǵan qaǵıdat boıynsha, transgender áıelder eger olar ózderin áıel retinde tanystyryp, eki jyl boıy testosteron deńgeıin tómendetip ustasa, jarysqa qatysa alatyn.
Qazir kásibı tenıste eshbir deńgeıde belsendi transgender áıelder joq.
«SRY genine bir rettik testileý ÁTQ týrnırlerine qatysý quqyǵyn rastaıdy», — dedi ÁTQ ókili Reuters agenttigine. «Oıynshylardy testileý 2026 jyly bastalady, bul rette qupıalylyq pen derekter qaýipsizdiginiń barlyq sharalary saqtalady. ÁTQ bul sezimtal ári kúrdeli másele ekenin túsinedi jáne barlyq oıynshylarǵa ádil qarap, saıasatty qurmetpen ári oılastyra júzege asyrýǵa mindettenedi».
Transgender oıynshy Rını Rıchards 1977–1981 jyldar aralyǵynda áıelder kásibı týrnede óner kórsetken. Keıin ol tenıs ańyzy, gomoseksýaldar quqyǵyn qorǵaýshy Martına Navratılovanyń jattyqtyrýshysy boldy. 18 ret «Úlken dýlyǵa» týrnıriniń jeńimpazy atanǵan Navratılova sporttaǵy transgenderlerdiń qatysýyn synap keledi. Al álemniń birinshi raketkasy Arına Sabalenka áıelderdiń transgenderlermen kezdesýin ádiletsiz dep sanaıdy.
12 ret «Úlken dýlyǵa» jeńimpazy, 1973 jyly ataqty «jynystar aıqasynda» jeńiske jetken Bıllı Djın Kıng transgenderlerdi shettetý kemsitýshilik dep esepteıdi.
Sońǵy jyldary Álemdik jeńil atletıka jáne Álemdik boks sıaqty birqatar sport federasıalary osyndaı genetıkalyq testilerdi engizgen.
Naýryz aıynda Halyqaralyq olımpıada komıteti áıelder sanatyndaǵy jarystarǵa tek bir rettik testileýden ótken bıologıalyq áıel sportshylar ǵana qatysa alatynyn málimdedi.
Transgenderlerdi qorǵaý toptary transgender sportshylardy shettetý kemsitýshilik dep sanaıdy. Al transgenderlerdiń qatysýyna qarsylar erkekterdiń jynystyq jetilýi sportshylarǵa bulshyqet jáne qańqa artyqshylyǵyn beretinin, aýysý kezinde bul artyqshylyqtyń joıylmaıtynyn aıtady.